Ambasada e Shteteve të Bashkuara ka reaguar për situatën e tensionuar që u krijua sot në Parlament dhe jashtë tij. Me anë të një postimi në rrjetin social “Facebook” ambasada amerikane deklaron se dhuna në Parlament është e pavend.
Ambasada ka dënuar dëmtimin e pronës publike, duke shtuar se “hedhja e granatave tymuese në Parlament dhe dhuna nuk janë të pranueshme”. Ambasada deklaron se Prokurori i Përgjithshëm që refuzonte të ndiqte penalisht politikanë është i ikur.
Në shkrim paralajmërohet për ndjekje penale ndaj zyrtarë të korruptuar të nivelit të lartë dhe në reagim thuhet se qytetarët shqiptarë presin me padurim për drejtësi, ndërkohë shton se politikanët shqiptarë janë të korruptuar.
Postimi i plotë i ambasadës
Ambasada e Shteteve të Bashkuara dënon me forcë dhunën që ndodhi në protestën e sotme në Tiranë. Ne mbështesim të drejtën e qytetarëve për të protestuar paqësisht, por dëmtimi i pronës publike, hedhja e granatave tymuese në Parlament dhe dhuna nuk janë të pranueshme. Ne i bëjmë thirrje të gjitha partive që të tregojnë vetëpërmbajtje dhe të nxisin qetësi.
Populli shqiptar nuk duhet të habitet që politikanët e tyre po luftojnë njëri-tjetrin. Kjo do të thotë se reforma në drejtësi më në fund po zbatohet. Komisionet e Vettingut do të kenë së shpejti rezultatet e tyre të para. Prokurori i Përgjithshëm që refuzonte të ndiqte penalisht politikanë është i ikur. Së shpejti do të shohim krijimin e SPAK-ut dhe BKH-së, të cilat do hetojnë dhe ndjekin penalisht zyrtarë të korruptuar të nivelit të lartë. Qytetarët shqiptarë presin me padurim për drejtësi. Dhe politikanët kanë frikë.
