AP
Një punonjës që vrau nëntë persona në një platformë treni në Kaliforni dhe më pas vrau dhe veten, teksa forcat e rendit mbërritën në vendngjarje , kishte folur për “vrasje njerëzish në punë” më shumë se dhjetë vjet më parë, tha ish-gruaja e tij.
“Asnjëherë nuk e besova dhe nuk ndodhi kurrë…deri sot,” tha e përlotur Cecilia Nelms për Associated Press të mërkurën pas sulmit në orën 6:30 të mëngjesit në një strukturë hekurudhore.
“Kur policët tanë shkuan aty, ai ishte ende duke qëlluar në fillim. Kur një nga njerëzit tanë e pa, ai vrau veten”, u tha gazetarëve Sherifja e Qarkut Santa Clara, Laurie Smith.
Burri i armatosur kishte dy pistoleta gjysmë automatike, tha sherifja të enjten në emisionin “Sot” të NBC. Një kanat dollapi i kyçur në platformën e hekurudhës që besohet se ishte autorit përmbante “materiale shpërthyese, tela detonatori, materiale eksplozivi”, tha Smith.
Numri i njerëzve të qëlluar për vdekje nga personi i armatosur shkoi në nëntë pasi mjeku i kontesë së Santa Clara konfirmoi vdekjen e 49-vjeçarit Alex Ward Fritch. Ai ishte i plagosur dhe i shtruar në spital në gjendje kritike pas sulmit.
Qitësi u identifikua si Samuel Cassidy, 57 vjeç, sipas dy zyrtarëve të zbatimit të ligjit të cilët nuk u lejuan të diskutojnë publikisht hetimin dhe folën me Associated Press në kushte anonimiteti.
