Xherdan Shaqiri, për herë të parë pasi iu bashkua Liverpoolit nisi një ndeshje si titullar dhe rezultatet ishin fantastike. Ai detyroi futbollistin e Southampton që të shënonte një autogol dhe më pas ishte protagonist me një goditje dënimi fantastike e cila përfundoi në trekëndësh dhe u kthye në një asist për Salah. Por duket se kjo performancë fantastike nuk ka mjaftuar për Jurgen Klopp, i cili e zëvendësoi në fundin e pjesës së parë.
Sipas trajnerit gjerman ja kush ishte arsyeja që ai zëvendësoi Shaqirin: “I thash Shaqirit se nuk kam zëvendësuar kurrë më parë në pushim të ndeshjes një futbollist që kishte rezultuar kaq vendimtar në pjesën e parë të lojës, por ne kërkonim të kishim më shumë kontroll mbi lojën. Ai nuk ishte i dëmtuar.
Shaqiri është një djalosh fantastik. Goditja e dënimit ishte e jashtëzakonshme. Ai tentoi gjithçka dhe është një futbollist i mirë për ta patur në ekip. I shkëlqyer në fazën ofensive, i nevojitet të punojë më shumë në atë difensive”, deklaroi trajneri i Liverpool, Jurgen Klopp.
