Xherdan Shaqiri është kthyer në një futbollist mjaft të rëndësishëm për Liverpool-in. Ndeshje pas ndeshje ai po tregon rritje dhe po merr në dore frenat e mesfushës. Vlerat e tij janë të padiskutueshme pasi është fituesi i një titulli Champions League me Bayern Munich dhe më pas ka pasur një eksperiencë në Itali me Interin. U bashkua me Stoke City në Angli, por kjo rezultoi si një trampolinë perfekte për tu bashkuar me Liverpool.
Lëvdatat për Shaqirin për paraqitjet në javët e fundit kanë qenë të shumta, ndër ta ka folur edhe ish-trajneri i tij tek Basel, Thorsten Fink. Ai është shprehur se zvicerani me origjinë shqiptare e ka talentin e lindur si ylli i Barcelonës, Lionel Messi dhe nëse vazhdon të punoj shumë, ai mund të bëhet lojtari më i mirë i Liverpoolit.
“Cristiano Ronaldo ka punuar për çdo gjë që ka arritur, ndërsa Messi e ka pasur këtë talent, ai nuk ka punuar për ta arritur atë. Për mua, Messi thjesht ka lindur i talentuar dhe kjo gjë vlen edhe për Shaqirin”, ka thënë Fink, i cili tani është trajner i Grasshopers.
Shqiptari ka filluar ta dëshmojë talentin e tij në Anfield gjatë kohëve së fundit, ku ka filluar të luajë më shumë për skuadrën e Jurgen Klopp. Ish-trajneri i tij, Fink, beson se ai mund të bëhet lojtari më i mirë i kësaj skuadre për shkak të talentit të lindur që e ka.
“Ai ka një talent për të luajtur futboll. Nëse punon si profesionist, ai mund të bëhet lojtari më i mirë i Liverpoolit, dhe jo vetëm një lojtar i thjeshtë. Çdo herë, qëllimi është për t’u bërë më i mirë. Nuk mjafton për të nëse nuk luan çdo javë për Liverpoolin, ai synon të luajë çdo javë”.
