Lulzim Alushaj është kandidati i tretë që futet në garë për postin e prokurorit të përgjithshëm, që pritet të zgjidhet në fillim të verës në vendin tonë.
Ndërkohë që më herët ka aplikuar për postin e prokurorit të përgjithshëm edhe Olsian Çela, i cili është prokuror pranë Krimeve të Rënda.
Paraditen e sotme zyrtarizoi kandidaturën dhe Prokurorja e Apelit në Tiranë, Fatjona Memçaj.
Ajo ka përfunduar shkollën e Magjistraturës në 2002, dhe gjithashtu ka mbaruar studimet për doktoraturë në Universitetin Middlesex, Londër.
Memçaj njihet si prokurorja që dënoi në apel Kastriot Ismailin, dhe prokurorja që ka përfaqësuar çështje kundër korrupsionit. Fatjona Memcaj aktualisht është edhe Anëtare e Këshillit të Emërimeve në Drejtësi.
Lulzim Alushaj – Prej vitit 2005, ai ka marrë titullin profesional “Avokat nga Dhoma Kombëtare e Avokatisë” në Itali. Ai gjithashtu është doktor i shkencave juridike me rezultate të shkëlqyera në Napoli. Doktoraturën në Itali e ka mbrojtur në fushën e studimeve, “Qeverisja e BE-së, politikat shoqërore dhe fiskale”, si dhe ka mbrojtur temën me titull: “Politikat e integrimit evropian, duke u nisur nga fushat sociale, ekonomike dhe juridike”.
Fatjona Memçaj dorëzoi sot kërkesën për Prokurore e Përgjithshme pranë Këshillit të Lartë të Prokurorisë. Prokurorja e Gjykatës së Apelit të Tiranës, Memçaj dorëzoi dokumentacionin e nevojshëm pranë KPK paraditen e së premtes (26 prill). Memçaj u konfirmua në detyrë më 3 maj 2018 pasi kaloi me sukses Vettingun. Po ashtu edhe nga verifikimi i figurës dhe aftësisë profesionale, Fatjona Memçaj rezultoi e përshtatshme për detyrën që mban.
Ndërsa kandidati i parë i regjistruar në garë është Olsian Çela. Aktualisht prokuror te Krimet e Rënda, dorëzoi kandidaturën në 19 prill.
