Zgjedhjet e parakohshme parlamentare në Kosovë kanë tërhequr vëmendjen e mediave të huaja, të cilat përmes artikujve, fokusohen tek premtimet e elitës politike.
“New York Times” shkruan se një gjeneratë e re politikanësh po sfidon për herë të parë “gardën” e vjetër.
“Qëkur Kosova përfundoi luftën e saj me Serbinë dy dekada më parë, figurat e saj politike mbizotëruese kanë qenë të gjithë burra që u ngritën si luftëtarë dhe e mbajtën pushtetin, pavarësisht se nuk arritën të siguronin një paqe të qëndrueshme dhe një ekonomi të mirë. Ndërsa mbetet ndarja e hidhur me Serbinë, me qeverinë në Beograd që refuzon ta njohë Kosovën si komb të pavarur, dhe shpresat për pajtim duken akoma larg, vëzhguesit shpresojnë se votimi mund të sigurojë një mundësi që vendi të shkëputet nga korrupsioni dhe keqmenaxhimi i viteve të pasluftës dhe përqendrohet në qeverisje më të mirë”, shkruan gazeta prestigjioze amerikane.
Po ashtu, media në fjalë, ka cituar edhe drejtorin e Institutit Kosovar për Kërkimin dhe Zhvillimin e Politikave në Prishtinë, Lulzim Pecin, i cili tha se “kjo është një mundësi që gjenerata e re e politikanëve të thyejë ciklin e përdorimit të Serbisë si një justifikim për gabimet e qeverive të Kosovës”.
Nga ana tjetër, “Euronews” shkruan se problematikat kryesore që kanë ngulur rrënjë janë korrupsioni që është gjithnjë e në rritje, si dhe firmosja e marrëveshjes së paqes me Serbinë.
“Sipas sondazheve, pakënaqësia publike me arritjet e Haradinajt në krye të koalicionit trepalësh ka rritur mbështetjen për partitë opozitare”, shkruan mes të tjerash “Euronews”.
