Rriten interesat e letrave të borxhit qeveritar.
Sipas të dhënave nga Banka e Shqipërisë, bonot me maturim 12 mujor u emetuan të martën me një interes mesatar të ponderuar prej 2.54%, nga 2.45% që ishte në ankandin e mëparshëm.
Edhe interesi i bonove 6-mujore është rritur, duke kaluar nga 1.82% në 2.04% që kishte qenë në ankandin e mëparshëm.
Kërkesa e tregut për bono rezultoi e mjaftueshme, me një total prej 12.6 miliardë lekësh, nga 11.7 miliardë lekë të shpallura për financim nga qeveria, por pavarësisht kësaj, korrektimi në rritje i interesave vijoi.
E njëjta gjë ndodhi të hënën me ankandet e obligacioneve 2 vjeçare, ku kuponi u rrit më tej në 2.99%, raporton Scan.
Gjallërimi i kërkesës dhe shëndoshja e sistemit bankar po e përmirëson kreditimin, duke zhvendosur më shumë fonde në financimin e sektorit privat, për rrjedhojë investitorët po kërkojnë një çmim më të lartë për të financuar borxhin e qeverisë.
Vetë qeveria shqiptare pret në horizont një rritje të interesave të borxhit, projeksion që është shprehur edhe në relacionin e projektbuxhetit e vitit 2018. Sipas projektbuxhetit, interesat e borxhit të brendshëm për vitin e ardhshëm pritet të arrijnë në 25 miliardë lekë, në rritje me tre miliardë lekë krahasuar me këtë vit.
