Kryetari i Komisionit për Kosovën pranë Parlamentit të Serbisë, Milorad Drecun deklaroi se vrasja e Oliver Ivanoviç do të hetohet në dy pista, duke i akuzuar si porositës: Kadri Veselin dhe Washingtonin. Në një intervistë për televizionin publik serb, RTS, Drecun thekson se hetimet duhet të zhvillohen në dy pista: Kadri Veselin dhe Washingtonin. Ndërkohë pse Prishtina nuk dëshiron bashkëpunim me Beogradin për të hetuar vrasjen, sipas tij, është manipulimi që ata duan ti bëjnë provave që janë mbledhur deri më tani në terren.
Ai vlerëson se hetimet e deritanishme tregojnë për një vrasje të mirëpërgatitur, të realizuar me efikasitet të plotë nga ana e profesionistëve.
Me këtë rast, Drecun jep edhe një detaj për të cilin Drejtori i Përgjithshëm i Policisë së Kosovës, Shpend Maxhuni, nuk preferoi të flas dje: “Në Ivanoviçin është gjuajtur nga një makinë në lëvizje, “Opel Astra” e cila është gjetur e djegur dhe për të cilën thuhet se është përdorur nga sulmuesit. Pronari i kësaj makine ka vdekur, pra nuk ekziston, makina është blerë në vitin 1994, pra, gjithçka është planifikuar në detaje, ky është një atentat me karakter rajonal,” tha Drecun duke shtuar se hetimi duhet të ketë dy pista: “Kadri Veseli, kryetar i parlamentit të Kosovës i cili është edhe shef i shërbimit sekret. Ky shërbim vepron në veçanti në jug të Mitrovicës dhe kryen operacione antiserbe në Veri. Mendoj se mund të jap shumë informacione për këtë vrasje”, vlerëson Drecun, sipas të cilit pista e dytë është Washingtoni, shkruan titulli.com.
“Departamenti amerikan i Shtetit duhet të jap informacionet e shërbimeve të tyre sekrete në bazë të cilave kanë bërë vlerësimin që në periudhën e ardhshme priten trazira dhe incidente në veri të Kosovës. Të shohim se në çfarë informacione janë bazuar këto analiza. A mos është ndoshta njëra nga informacionet e pakonfirmuara se para një muaji në Shqipëri është futur një grup i vrasësve profesionistë. Ku janë ata, dhe çfarë ka ndodhur me ata,” përfundon Drecun edhe pse pas mbledhjes së Këshillit të Sigurisë, Presidenti i Serbisë, Aleksandër Vuçiç këtë raport të Departamentit amerikan të Shtetit, të 10 Janarit 2017, e vlerësoi si një raport rutinë i cili bëhet çdo vjet në prag të Vitit të ri Ortodoks.
