Autoritetet në Serbi thanë se presidenti serb, Aleksandër Vuçiç, ka urdhëruar hetimin e raportimeve për një aferë të dyshuar spiunazhi, dyshimet për të cilën u nxitën nga video e postuar në rrjetet sociale, ku shihet një agjent i shërbimit rus të zbulimit, duke i dhënë para një zyrtari të shërbimit serb të sigurisë.
Një zyrtar i Agjencisë Informative dhe të Sigurisë së Serbisë, e njohur si BIA, i tha të mërkurën televizionit shtetëror serb se video xhirimi është autentik.
Videoja ishte postuar më 17 nëntor në kanalin You Tube.
Aty shihet një diplomat rus duke i dhënë një qese agjentit serb në Beograd, nga e cila ky fundit nxori një zarf me para.
Ministri serb i Mbrojtjes, Aleksandër Vulin, i tha agjencisë serbe të lajmeve Tanjug, se gjatë 24 orëve të fundit janë zhvilluar një sërë takimesh me presidentin serb, Aleksandërr Vuçiç rreth kësaj çështjeje dhe se më shumë informacione mund të priten gjatë ditës së nesërme, kur pritet të mblidhen shefat e shërbimeve të zbulimit dhe kundërspiunazhit.
“Situata është serioze dhe komandanti suprem (presidenti Vuçiç) do të shpalosë përfundimet pas shqyrtimit të hollësishëm”, tha ministri serb.
Më herët gjatë ditës, mediet serbe cituan kryeministren Ana Bërnabiç të ketë thënë që “nëse kjo del e vërtetë, do të jetë një problem i madh”.
Mediet në Serbi thanë se presidenti serb do të diskutoje të enjten këtë çështje edhe me ambasadorin rus në Beograd, Alexander Bocan Harchenko.
Ishte gazetari bullgar Christo Grozev, i cili shkroi në rrjetin twitter gjatë fundjavës se në videon e publikuar në YouTube, shihet ish ndihmësi i atasheut ushtarak në ambasadën ruse në Beograd që po takohej me agjentin serb në një operacion të fshehtë.
Zyrtari i BIA-s serbe, Rela Zhelski, pohoi se në video shihet agjenti rus i zbulimit, Georgij Kleban, por nuk dha asnjë hollësi për agjentin e dyshuar serb.
Serbia mbetet aleat i Rusisë, ndonëse synon anëtarësimin në Bashkimin Evropian. Beogradi është zotuar se do të qëndrojë jashtë NATO-s dhe ka refuzuar t’u bashkohet sanksioneve perëndimore ndaj Rusisë për shkak të konfliktit në Ukrainë.
Rusia mbështetë qëndrimin e Beogradit i cili kundërshton pavarësinë e Kosovës të shpallur në shkurt të vitit 2008 me mbështetjen e Shteteve të Bashkuara dhe vendeve kryesore të Bashkimit Evropian. /VOA
