Në Serbi ka bërë betimin Presidenti i ri i vendit. Aleksandër Vuçiç, ka bërë betimin duke marrë postin e kreut të shtetit dhe është zotuar se do të mbajë paqen e stabilitetin
Në të njëjtën kohë që është mbajtur ceremonia, ka pasur dhe protesta opozitare të cilat kundërshtuan inaugurimin e tij. Vuçiç, 47 vjeçar, është betuar sot në mesditë, për të pasuar presidentin në largim Tomisllav Nikoliç.
Në rrugën e tij drejt inaugurimit, protestuesit e mbështetur nga shumica e partive opozitare tentuan të kalonin përpara ndërtesës së parlamentit në Beograd, para se të pengoheshin nga policia.
“Betohem se do të bëj çdo përpjekje për të ruajtur sovranitetin dhe integritetin territorial të Republikës së Serbisë, duke përfshirë Kosovën dhe Metohinë si pjesë të saj përbërëse, realizimin e të drejtave të njeriut dhe të pakicave. Do të garantoj të gjitha liritë që mbrohen nga Kushtetuta dhe ligji, do angazhohem për paqen, stabilitetin dhe mirëqenien e të gjithë qytetarëve të Republikës së Serbisë. Betohem”, ka thënë Vuçiç.
Fitorja e tij në zgjedhjet e 2 prillit erdhi gati një vit pasi, Partia Progesive Serbe, që udhëhiqet nga Vuçiç, i fitoi zgjedhjet parlamentare.
Vuçiç ka forcuar kontrollin e tij në pushtet dhe ai e konsideron veten reformator në rrugën e Serbisë drejt anëtarësimit në Bashkimin Evropian.
Disa kritikë kanë paralajmëruar se kontrolli i Partisë Progresive Serbe mbi tërë fuqinë legjislative dhe qeverisëse mund të shtyjë Serbinë drejt një autokracie.
