Një skaf i cili drejtohej nga dy shqiptarë, është sekuestruar nga ana e policisë, e ndërsa në të ndodhej 700 kg marijuanë. Kapja e kësaj sasie droge është arritur në sajë të një operacioni të kryer nga policia shqiptare, në bashkëpunim me atë italiane.
Personat që kanë rënë në pranga janë shtetasit me inicialet D.G., 22-vjeç dhe A.R., 30-vjeç.
“Ditën e djeshme, Policia Kufitare e Vlorës, mbi bazën e informacioneve të siguruara në rrugë operative, është vënë në ndjekje të një mjeti detar, i dyshuar për trafik narkotikësh, duke njoftuar njëkohësisht Prokurorinë e Krimeve të Rënda për rastin.
Pasi kanë humbur kontaktet dhe mjeti në ndjekje hyri në ujërat ndërkombëtare, Policia Kufitare njoftoi autoritetet italiane, dhe nisi koordinimi i veprimeve.
Në orët e para të mëngjesit të sotëm, Policia e Shtetit dhe Guardia di Finanza në Itali, finalizuan me sukses operacionin, edhe si rezultat i bashkëpunimit efektiv të forcave policore të dy vendeve, nëpërmjet zyrave ndërlidhëse.
Në afërsi të lokalitetit Sant Andrea, Otranto, u bë i mundur sekuestrimi i mjetit në ndjekje, që drejtohej nga dy shtetas shqiptarë, me inicialet D.G., 22-vjeç dhe A.R., 30-vjeç. Në skaf u sekuestrua rreth 700 kg marijuanë.
Janë në vijim hetimet në dy anët e Adriatikut, për kapjen e personave të tjerë të përfshirë në këtë tentativë trafiku”, bën me dije policia.
