Ish-Ministri i Brendshëm, Saimir Tahiri, në një prononcim të shkurtër për mediat, tha se ishte paraqitur në ambientet e Prokurorisë, për të paraqitur një provë. Kjo sipas tij ishte deçizive.
Ai po kështu ka kërkuar mirëkuptimin e mediave, pasi për punë ditësh do të tregojë arsyen e vërtetë pse ai u shfaq sot tek Krimet e Rënda. Tahiri ka qëndruar shumë pak në ambientet e Prokurorisë, ndërsa ishte i shoqëruar nga avokati i tij Maks Haxhia.
“Paraqita diçka që ka rëndësi për procesin, por do kërkoj mirëkuptimin tuaj. Do flas pas dy-tre ditësh për të thënë çfarë është. Provë që e quaj deçizive. Prisni dy-tre ditë, do e dëgjoni. Kam një vit që dëgjoj pafundësisht dhe kam heshtur, prisni ju tani”, tha Tahiri.
Prej më shumë se një viti Tahiri është nën hetim nga ana e Prokurorisë, për lidhjen e tij me grupin e Habilajve.
Krimet e Rënda kanë shtyrë hetimet për Tahirin deri në muajin janar, ndërsa më pas do të vendoset edhe fati i tij lidhur me akuzat për përfshirje në “trafikun e drogës”.
Më tej ai ka thënë se “nuk ka frikë”, kur është pyetur nga gazetarët nëse do të merret si pandehur apo jo.
