Detaje të reja janë hedhur në dritë sa i takon ngjarjes në një hotel në Tiranë, ku klienti tentoi të vriste pronarin. 30-vjeçari Ervin Selita, pas një konflikti me recepsionistin në një hotel në Tiranë, ka tentuar të vrasë me armë zjarri pronarin e saj. Ervini është reper, pjesë e grupit shqiptar në Londër “Hellbanianz”. Ai njihet me emrin e artit “Vinz”.
Selita ka lindur në Burrel, ndërsa jeton në Britani. Karrierën e nisi atje, në bashkëpunim me të tjerë shqiptarë dhe reperë të huaj.
“Vinz” ka në repertorin e tij shumë këngë. Kënga e tij më e fundit, një bashkëpunim me Stealth, që është publikuar 2 shkurtin e 2022, titullohet “Poppin Smoke”.
“Hellbanianz” është grupi muzikor që e ka zhvilluar aktivitetin mes Londrës dhe Tiranës. Anëtarët e kësaj bande kanë qenë shumë herë në fokus të investigimeve të mediave angleze për këngët e tyre të dhunshme dhe jetën e shtrenjtë, mes makinave luksoze e me dyshimet se të ardhurat e kanë fituar nga aktivitete kriminale.
