Boksieri Florian Marku është pritur me ceremoni të veçantë nga kreu i qeverisë Edi Rama sot në Kryeministri. Marku ka rrëfyer fillimet e vështira të karrierës së tij. Në ceremoninë e zhvilluar në Kryeministri, ku iu dorëzua titulli “Ylli i Madh i Mirënjohjes Publike”, boksieri shqiptar Florian Marku ka treguar se si nisi karriera e tij dhe të gjitha peripecitë që kaluar. Ai zbuloi se familja e tij ka punuar në Greqi në emigracion, ndërsa shtoi se i është dashur shumë punë dhe sakrifica dhe se pavarësisht ofertave asnjëherë nuk e ka hedhur poshtë flamurin shqiptar.
“Faleminderit kryeministrit, kryebashkiakut, faleminderit dhe Taulant Ballës që na ka përkrahur. Kjo është ëndërr që është bërë realitet. Gjithë Shqipëria që më sheh mua është emocion, nuk di çfarë të them. Në karrierën time kam qenë realist e do ngelem ashtu.
Kam lindur në Lushnjë dhe 7 vjeç kemi ikur me familjen në Selanik. Hyra në boks, unë nuk vij nga një familje e pasur. Të dy prindërit e mi kanë punuar, por kam qenë i vogël, i kam thënë nënës që kur të rritem nuk do të punosh më kurrë. Ja kam dedikuar jetën këtij sporti. U bëra shumë herë kampion Greqie, s’e kam hedhur kurrë poshtë flamurin shqiptar.
Në kick boks kam pasur karrierë shumë të suksesshme. I kam operuar duart pesë herë, është sport shumë i vështirë. Kam qenë në Greqi pa letra, në Angli kam shkuar rastësisht, nga një promotor që na gënjeu. Më thanë kur të vish do kesh palestër, do të kesh çdo gjë e ne nuk gjetëm asgjë.
Por, e kisha ëndërr që të boksojë në Angli dhe ishte fat që të ndodhesha atje. Në fillim askush nuk më besonte, por më vonë suksesi erdhi me punë e sakrifica. Shqiptarët nuk më kanë zhgënjyer kurrë, e kanë mbushur sallën plot kudo që jam ndeshur”, deklaroi Florian Marku.
