Kryebashkiaku i sapo betuar i PS-së në Devoll, Eduard Duro ka mbërritur në ambientet e bashkisë, menjëherë sapo kryetari i kësaj bashkie në largim, Bledion Nallbati i PD-së, ka përfunduar orarin zyrtar të punës.
Nallbati është larguar nga zyra pasi ka mbaruar punën, ndërsa, në videon e siguruar për “BalkanWeb”, shihet momenti teksa përcjellit me duartrokitje nga mbështetësit e tij. Ndërkohë, një punonjëse e bashkisë ka mbyllur derën e jashtme të ndërtesës dhe është larguar bashkë me ish-kryebashkiakun.
Kështu që dera e bashkisë është hapur me forcë nga një komision i zgjedhur nga kryetari i ri i bashkisë. Një punonjës i bashkisë ka thyer bravën e derës, duke e hapur atë, në mënyrë që të futet në zyrën e tij kryebashkiaku i ri. Nga ana e tij, ky i fundit tha se dera do të hapej qetësisht, ashtu siç ishte mbyllur.
“I kam bërë kërkesë kryetarit paraardhës dhe komisariatit të policisë Devoll, që personat e paautorizuar nuk duhet të rrinë në territorin e bashkisë. Aty kishte njerëz që nuk janë pjesë e këtij komuniteti, nuk lejohet të protestojnë në korridoret e bashkisë. Kryetarit i kërkoj dorëzimin e zyrës. Pas orës 16:00 policia të jetë prezente në hapjen e institucionit të bashkisë. Ne do ta hapim qetësisht”, deklaroi Duro.
