Edhe pas dorëheqjes, Xhafaj nuk ka munguar as sot në zyrën e tij. Ministri i dorëhequr, Fatmir Xhafaj, do të vazhdojë të qëndrojë edhe për disa ditë në detyrë. Të paktën deri të enjten, kur është parashikuar që në Kuvend të votohet dekreti i shkarkimit.
Kreu i shtetit firmosi shkarkimin e Xhafajt vetëm pak orë pasi kryeministri Rama njoftoi se kishte pranuar dorëheqjen e Ministrit të Brendshëm. Sakaq, presidenti Meta nuk është shprehur ende për propozimin e shefit të qeverisë, këshilltarit të tij Sandër Lleshi, për të marrë drejtimin e dikasterit të Rendit, më i sulmuari në kabinetin e Ramës.
Presidenti ka 7 ditë kohë, në të cilën bën të gjitha verifikimet rreth propozimit, ndërsa burimet pranë tij thonë se lëvizja mund të jetë në fillim të javës. Seanca e Parlamentit është të enjten, kur edhe do të votohet dekreti i shkarkimit të Fatmir Xhafajt si Ministër i Brendshëm.
E nëse Meta ka firmosur emërimin e ri, në seancë do të kalojë edhe dekreti i pasuesit të Xhafajt, gjeneralit Sandër Lleshi.
Sot PD e cilësoi largimin e Fatmir Xhafajt nga posti i Ministrit të Brendshëm si rezultat i luftës që ajo dhe krejt opozita i ka bërë që nga dita emërimit, për dosjen penale të vëllait të tij. Kryedemokrati ishte në një takim partiak në Manëz të Durrësit, ku zbuloi faktorët që sipas tij, çuan në largimin e Fatmir Xhafajt.
