Pas përfundimit të Samitit të Brdo Brijunit, presidenti i Kosovës, Hashim Thaçi, ka deklaruar për mediat se presidenti i Serbisë, Aleksandër Vuçiç i ka mohuar krimet e kryera në Kosovë. Në Samit, shefja e politikës së jashtme në BE, Federica Mogherini mbajti takim me Presidentin e Kosovës, Hashim Thaçin, dhe atë të Serbisë, Aleksandër Vuçiç. Thaçi bëri të ditur se ka kërkuar që Kosova të ketë liberalizim të vizave.
Pas takimit me Mogherinin dhe Aleksandër Vuçiç, Thaçi ka deklaruar se kishte kërkuar liberalizimin e vizave për Kosovën, dhe se taksa ndaj Serbisë mbetet një vendim i drejtë. Po kështu ai ka vënë në dukje mospajtimet me Vuçiç, pasi mohon krimet e kryera në Kosovë, e kjo për të është krim.
“Taksa mbetet vendim i drejtë, kushtëzimi i dialogut është i padrejtë nga ana e Serbisë. Kam fol me Vuçiç në kuadër të Samitit, dhe asgjë tjetër. Kam treguar që nuk do të ketë asnjë asociacion me kompetenca ekzekutive në Kosovë të tipit të Republikës serbe. Kemi pas mospajtime sa i përket çështjes që Vuçiç mohon krimet e kryera në Kosovë, dhe kjo është krim”, ka thënë Thaçi.
Ai gjithashtu përmendi edhe çështjen e korrigjimit të kufijve.“Ne jemi për një marrëveshje gjithëpërfshirëse për njohjen e Kosovës, pa censurë, asnjë milimetër tokë të Kosovës, dhe me bashkëngjitjen e Luginës së Preshevës me Kosovën”, ka thënë Thaçi.
