Mbi 150 liderë biznesi nga Evropa Juglindore, katër kryeministra nga Ballkani Perëndimor, ministra dhe përfaqësues nga Bashkimi Evropian morën pjesë në “Samitin rajonal 100” në Shkup.
Tema kryesore e Samitit ishte bashkëpunimi në fusha të ndryshme dhe në nivele të ndryshme. Një nga folësit kryesorë ishte eurokomisarja për Transport, Violeta Bulc të cilës iu bashkuan liderë të njohur të biznesit, përfaqësues të kompanive të njohura nga rajoni, si Hidrija, ASA Group, Fondacioni Atlas, Grupi Atlantik, Gorenje, BMV, Podravka, Filip Moris, BBI, Uber, Bambi dhe të tjerët, si dhe përfaqësues nga institucionet financiare ndërkombëtare si Banka Evropiane për Ripërtëritje dhe Zhvillim, Korporata Financiare Ndërkombëtare, Banka Evropiane e Investimeve, Banka Botërore dhe shumë përfaqësues të tjerë të sektorit të biznesit.
Samitin zyrtarisht e hapi kryetari i Bordit të Samitit 100, Zhivko Mukaetov dhe Presidenti i Republikës së Maqedonisë, Gjorge Ivanov.
Tema kryesore për sot ishte “E-Koncepti për përshpejtimin e rritjes bazuar në lidhshmërinë” në të cilin mori pjesë edhe zëvendëskryeministri i Angazhuar për Çështje Ekonomike, Koço Angjushev.
“Ëndrra e ‘Samitit 100’ që shpresojmë se do të jetësohet në realitet, është qarkullimi më i shpejtë i mallrave dhe i njerëzve të këtij rajoni”, u shpreh Zhivko Mukaetov, Kryetar i KD të Samitit.
“Kjo nuk mund të implementohet pa lidhje ndërkufitare dhe pa lidhje transporti. Hekurudha është mënyra më e mirë për të shkuar përpara, sepse në të njëjtën kohë, ballafaqoheni me sfidat e dekarbonizimit”, tha Violeta Bulc, Eurokomesare për Transport.
Për ditën e nesërme është konfirmuar pjesëmarrje e kryeministrave të Maqedonisë, Shqipërisë dhe Malit të Zi dhe kryesuesi i Këshillit të Ministrave të Bosnjës e Hercegovinës, Denis Zvizdiç.
Kryeministri Edi Rama kryeson delegacionin shqiptar dhe do të jetë pjesë e panelit të diskutimit mbi mundësitë e konkurueshmërisë së Rajonit në arenën globale.
Kryeministri i Kosovës, Ramush Haradinaj, ka njoftuar pamundësinë e pjesëmarrjes në këtë samit, për shkak “të agjendës me rëndësi në Kosovë”. Me një njoftim zyrtar qeveria e Kosovës njoftonte “Pamundësinë e pjesëmarrjes në Shkup e kryeministrit Haradinaj nuk ka të bëjë asgjë me atë se kinse ai nuk dëshiron ta takojë kryeministrin e Malit të Zi.”
Samiti i biznesit në Shkup, pjesë e agjendës së nismës së Berlinit, është vijim i përpjekjeve të vendeve të Ballkanit Perendimor në rrugën e tyre drejt integrimit evropian.
