Sekretari për Aksionin Qytetar në Partinë Demokratike, Ervin Salianji thekson se protesta që do të mbajë opozita më 13 maj në bulevardin “Dëshmorët e Kombit”, kundër qeverisë do të detyrojë kryeministrin Edi Rama të tërhiqet nga qëndrimet e tij për të arritur një zgjidhje të krizës politike.
Në një intervistë për “Tirana Today”, Salianji heq paralele me rastin e Kavajës. Ndaj thotë se kryeministri do të zmbrapset ashtu siç veproi në zgjedhjet vendore për kreun e bashkisë së Kavajës.
Si është e mundur që pas dy takimeve radhazi në Presidencë me kreun e shtetit Bujar Nishani, kryeministri Rama dhe kreu i PD-së Lulzim Basha nuk arritën të zgjidhin krizën politike?
Ulja në tryezën e negociatave është një lajm i mirë për Shqipërinë. Prej kohësh opozita ka kërkuar dialog për zgjidhjen e krizës, ndërsa Rama ka thënë që krizë nuk ka. Pas 4 vjet prepotencë dhe arrogancë nga ana e Ramës dhe e mazhorancës në qeverisje dhe në raportin që ndërtuan me qytetarët, duke mos dhënë asnjë llogari, por duke përvetësuar dhe shpërndarë çdo pasuri publike, duke e përqendruar vetëm tek disa duar që janë klientët e pushtetit. Pas protestës se 18 Shkurtit, në mendimin tim protesta më e madhe pas protestave të dhjetorit, shumica qeverisëse ka ndryshuar katërçipërisht qëndrimin dhe qasjen ndaj opozitës. Rezistenca tashmë 78 ditore e qytetarëve, intelektualeve, të rinjve, studentëve, të papunëve, të moshuarve etj., ka sjellë një dimension të ri të të bërit politikë në Shqipëri, një stinë të raportit mes politikës dhe qytetarit. Pranvera shqiptare do të mbahet mend si stina ku nisi rrugëtimin kthimi i pushtetit nga kryetarët e partive dhe një grusht njerëzish tek qytetari, do të mbahet mend si themeli i ndërtimit të një qasje të re dhe hedhjes së kolonave kryesore mbi të cilat do të ndërtohet shteti i së nesërmes, një shtet në shërbim të qytetarëve dhe jo qytetarët që janë në shërbim të shtetit. Forcimi i individit në shoqëri sjell zhvillimin e shoqërisë. Arritja e një zgjidhje politike mes Bashës dhe Ramës në vetvete nuk është çështja, mënyra se si do të arrihet zgjidhja e krizës së rëndë politike që ka përfshirë vendin. Por, problemi është edhe këndi nga i cili duhet të shikohen këto takime. Besoj që propozimet e Bashës dhe lëvizjes qytetare janë ato që ka nevojë vendi dhe jo Partia Demokratike. Nuk ka asnjë njeri që mendon që kauza e zgjedhjeve të lira dhe të ndershme është e gabuar.
Palët kanë lënë të kuptojnë se ka disa pika që kanë rënë dakord midis tyre. A ka një draft marrëveshje paraprake që mund të firmoset prej tyre?
Ka vetëm një marrëveshje me të cilën lëvizja popullore që është përtej PD-së do të bjerë dakord, zgjidhja është garantimi i zgjedhjeve të lira dhe të ndershme nëpërmjet krijimit të një qeverie teknike e cila do të bëjë të mundur rikthimin e besimit mes palëve dhe krijimin e kushteve për garë të barabartë. E keni parë që kryeministri del si triumfues para meidave duke thënë që unë jam lojtar i madh sepse arrita ti gënjej duke bërë blof ndërkombëtarët dhe opozitën, një njeri që ka përgjegjësinë e qeverisjes së vendit që sillet si fëmijë që me lëpirësen në dorë bërtet që unë jam mashtruesi më i zoti. Politika nuk është lojë por garanci për të përmirësuar jetën e qytetarëve nëpërmjet ballafaqimit të alternativave, të ekipeve të programeve, të cilat bëjnë të mundur marrjen e vendimeve që përmirësojnë jetën e qytetarëve. Ne nuk mund të luajmë me jetën e qytetarëve, ne po sakrifikojmë për të siguruar zgjedhje të lira dhe kjo do të bëjë të mundur një sjellje të re të politikanëve në raport me qytetarët dhe një cilësi më të mirë të përfaqësimit politik.
Pas dështimit të zgjedhjeve vendore në Kavajë, prej së cilës u shmang edhe përplasja midis forcave politike, opozita ka thirrur sërish një protestë më 13 maj
Ne datën 7 Maj opozita kishte thërritur një protestë paqësore dhe masive në qytetin e Kavajës për t’i treguar që zgjedhje pa opozitën nuk mund të ketë. Forca e bashkimit popullor, masiviteti dhe tubimi paqësor treguan se koha e zgjedhjeve me një parti ka marrë fund njëherë e mirë në këtë vend, se qytetarët nuk mund të bëhen pjesë e një procesi fasadë ku kandidati i vetëm që mund të marrë edhe vetëm 1 votë del fitues. Nuk kishte asnjë skenar për përplasje me qytetarët dhe nuk do të ketë asgjë të tillë. Protesta e 13 Majit do të bëhet për qytetarët kundër pushtetit dhe jo kundër qytetarëve, në protestë do te bashkohen masivisht edhe simpatizantë të Partisë Socialiste të cilët nuk mund të pajtohen me këtë model autoritarist të ushtrimit të pushtetit. Më datë 13 paqësisht dhe të vendosur qytetarët do të gjunjëzojnë përsëri Ramën siç bënë me zgjedhjet e Kavajës.
Ç’po ndodh brenda PD-së me “senatorët e vjetër” të cilët i janë kundërvënë Bashës për mënyrën e aksionit politik të opozitës? A është kjo një përpjekje për t’i marrë Bashës drejtimin e partisë?
Në PD po ndodhin debate dhe përplasje mendimesh për mënyrën se si duhet të sigurohen zgjedhjet e lira dhe të ndershme. Kjo është vlerë për shoqërinë që ka debate në një parti me më shumë së 100 mijë anëtare, do ketë mendime të ndryshme për mënyrën e të bërit opozitë dhe kjo është vlera që ka demokracia që secili ka mendimin e vet, dhe siç u pa nga tërheqja e Ramës në Kavajë, triumfoi e drejta për zgjedhje të lira dhe drejtësia e vendimit tonë. Opozita tregoi se drejtësia e kauzës së saj është përqafuar nga çdo qytetar dhe këtë e konfirmoi dhe zbythja e Ramës.
