Ish-badigardi i Sali Berishës, Sali Lushaj është shoqëruar mbrëmë në ambientet e policisë së Tiranës, pasi mori pjesë në protestën e organizuar nga opozita.
Sali Lushaj është një emër i lakuar shpesh në media, teksa njihet edhe si i ati i reperit Stresi.
Por, çfarë ndodhi dje dhe përse ai shkoi në komisariat?
Në një prononcim për Balkanweb, Lushaj ka treguar se gjithçka ka ndodhur pasi ai u bë pjesë e protestës së PD-së, ndërsa rrëfeu se është paraqitur vetë në Polici:
“Pas protestës, efektivët kanë shkuar në shtëpi dhe kanë kërkuar të më shoqërojnë mua. Aty kanë gjetur vetëm djalin tim. Pasi ai më kontaktoi rreth orës 8:30 apo 9 unë kam shkuar vetë në policinë e Tiranës”.
Më pas, ai ka treguar edhe bisedën me policët në komisariat, aty ku nuk i ka kursyer edhe batutat:
“Më pyetën a isha në protestën e PD, po i thashë. Unë kam protestuar gjithmonë për PD dhe ju duhet të na falënderoni se e mbyllëm atë 30 minuta para lejes, nuk kam shkelur asnjë ligj. Do dal në çdo protestë të PD nuk është fjali im që jam pak më i gjatë se të tjerët dhe bie në sy”, sqaron Lushaj.
Megjithatë, ai shton se pas marrjes në pyetje policët e kanë lënë të lirë.
“Gjatë kohës që më merrnin në pyetje u sollën shumë mirë”, sqaron Lusha ndër të tjera.
Për shoqërimin e tij ka reaguar edhe kreu i grupit parlamentar të PS-së, Taulant Balla, i cili publikoi një foto dhe shkruante: “Sali Berishës, “gjenerali” i një ushtrie të vdekur, i ka mbetur vetëm Sali Lushaj. Dy fotografi, sa 1000 fjalë për protestën dje”.
