Mohamed Salah është duke kaluar një formë fantastike me Liverpoolin. Sulmuesi egjiptian ka shkëlqyer që pas transferimit në kampionatin anglez me gola e asistime. Forma e mirë e Salah ka bërë që shumë analist sportiv ta lidhin atë me gjigantin spanjoll Real Madrid.
Së fundmi për Salah ka folur edhe numri një i ‘Los Blancos’, Zinedine Zidane. Trajneri francez e ka pranuar publikisht se Salah bën pjesë tek lojtarët e tij të pëlqyer.
“Salah është një futbollist i shkëlqyer këtë e tregoi te Roma dhe po shihet edhe tani te Liverpooli. Është vetëm 25 vjeçar dhe mund t’i japë shumë futbollit. Bën pjesë tek ata futbollistë që më pëlqejnë shumë”, deklaroi Zidane.
Por francezi nuk foli nëse do të dëshironte ta transferonte egjiptianin në Madrid. Gjithsesi mediat spanjolle dhe ato angleze janë të bindura se Salah do të jetë zëvendësues i Gareth Bales në ‘Santiago Bernabeu’.
