Uruguai i Suarez dhe Cavanit e ka nisur mbarë Botërorin me një fitore 1-0 përballë Egjiptit të Mohamed Salah. Ylli i Liverpool nuk është aktivizuar për shkak të dëmtimit që ka marrë në finalen e Champions League, pas një ndërhyrje nga Sergio Ramos. Trajneri Hector Cuper, lajmëroi dje se ai do të ishte në fushën e lojës por ditën e sotme vendosën që të mos e aktivizonin, një vendim ky që mund t’i kushtojë shumë egjiptianëve në fund.
Ndeshja fillon në ritme të larta nga të dyja ekipet që hidhen në sulm dhe kërkojnë me çdo kusht që të gjejnë golin e parë. Cavani dhe Suarez krijuan dy raste mjaft të rrezikshme në mesin e pjesës së parë, ku goditja e Cavanit u devijua në momentin e fundit nga mbrojtësit, ndërsa Suarez ka shpërdoruar një rast të pastër me portën e boshatisur. Ylli i Barcelona-s ka qenë protagonist edhe në pjesën e dytë, kur nuk ka arritur të shënojë, pavarësisht se ka qenë i vetëm përballë portieri El Shenawy.
Kundërpërgjigja e egjiptianëve ka ardhur në minutën e 72-të, me një goditje të bukur të Fathy nga distanca, me Muslera që e ka neutralizuar me një pritje po aq të bukur. Dy minuta më pas, Suarez ka shpërdoruar rastin e tretë për të shënuar, edhe pse është ndodhur përsëri i vetëm përballë portierit.
Në të 88-ën ka qenë fati që ka ndihmuar afrikanët, me goditjen e dënimit të Cavani-t që është ndalur nga shtylla. Një fat i keq që është transformuar në minutën e 90-të të takimit, kur qendërmbrojtësi Gimenez ka dërguar topin në rrjetë me një goditje me kokë.
Pas këtij rezultati, Grupi A kryesohet nga Rusia dhe Uruguai, me nga 3 pikë, ndërsa Arabia Saudite dhe Egjipti mbeten me zero pikë. Në ndeshjet e dyta, Egjipti do të ndeshet me Rusinë, ndërsa Uruguai do të luajë kundër Arabisë Saudite të vendit të fundit, me zero pikë.
