Shtyhet seanca ndaj ish-ministri të Brendshëm, Saimir Tahiri. Mësohet se shkak për shtyrjen është bërë mosnjoftimi i të pandehurve, ndërsa seanca e radhës do të mbahet më 3 korrik ora 09:00.
Tahiri ka kërkuar gjykim të shkurtuar, ndërsa teksa foli për mediat, ish-ministri refuzoi t’u përgjigjej disa prej pyetjeve të gazetarëve. Ai tha se kërkon vetëm drejtësi, dhe zvarritja e gjyqit prej gati 2 vitesh, po bëhet për disa interesa të caktuara.
“Procesi të shkojë para pa humbur kohë se boll është humbur kohë deri tani. Jam ministri më jetëgjatë, jam edhe më i miri madje. E kam boll një gjyq politik, s’ka nevojë të bëj politikë këtu jashtë. Kërkova gjykim të shkurtuar se nuk ka nevojë të zvarritet ky gjyq. Ka shumë persona që u intereson që ky gjyq të zvarritet, unë të zvarritem për drejtësi, më duket se jam i vetmi i interesuar për drejtësi.
Nuk ka sens të bëj politikë, kërkoj vetëm drejtësi. I kërkova gjykatës mundësisht t’i bëjë seancat ditë për ditë se nuk ka më kohë për të humbur. U bë dy vjet që zvarritet kjo histori, unë nuk e kuptoj përse edhe pse kam dyshimet e mia përse ky gjyq tërësisht politik zvarritet.
Ky proces nisi në Itali, jam hetuar atje dhe Gjykata në Itali e dha verdiktin në një kohë reale”, tha ndër të tjera Tahiri.
