Armando Sadiku ka zgjedhur që ti kalojë festat e fundvitit në Shqipëri. I ftuar në “Pasdite në Top Channel”, ai ka zbuluar ëndrrat e tij dhe futbollistin që ka idhull. Po ashtu elbasanasi ka treguar edhe për karrierën e tij që në fëmijëri deri sot që është pjesë e Legias.
“E kam nisur karrierwn që në moshën 7-vjeçare dhe ka qenë babai im, trajneri im i parë dhe ai që më shtynte të bëhesha futbollist. Kam luajtur me Turbinën dhe më pas me Gramozin, kur isha vetëm 18 vjeç dhe nuk isha mësuar larg familjes, për t’u kthyer te Elbasani më vonë. Pastaj, ndonëse shumë i ri, u largova në Itali, te Chievo, ku qëndrova shumë pak dhe u transferova te Lugano. Aty kam kaluar periudhën më të bukur të karrierës time si futbollist,” shprehet Sadiku.
Sulmuesi i kombëtares shqiptare ka analizuar edhe situatën e tij tek klubi aktual, ku gjërat nuk kanë shkuar aq mirë. Sadiku nuk ka gjetur akoma minutat e duhura në skuadër, por shprehet se në momentin që i jepet mundësia jep maksimumin për të ndihmuar ekipin.
“Me Legian bashkova këtë verë, sepse bëhet fjalë për një skuadër me mjaft histori. Nuk e nisëm mirë sezonin, pasi u eliminuam edhe nga kompeticionet europiane, por tani jemi rikthyer në rrugën e duhur. Ndonëse nuk po luaj aq sa dua, jam i gatshëm dhe jam munduar të jap kontributin tim, sa herë që kam zbritur në fushë.”
Kombëtarja është maja më e lartë për çdo futbollist shqiptarë, bëhet fjalë për grupin që u trajnua nga De Biasi dhe morën pjesë në Europian. Vetë Sadiku shprehet se ajo është periudha më e artë, por shprehet se shanset për të arritur atje edhe me Panuccin janë reale.
“Kombëtarja është një ëndërr e bërë realitet. Ndihem mjaft i lumtur që kemi arritur të kënaqim njerëzit me pjesëmarrjen në Europian. Me De Biasin kaluam një periudhë të artë, ndërsa edhe tani me Panuccin jemi në rrugën e duhur. Duam të shkojmë sërish në Europian dhe të bëjmë të lumtur të gjithë shqiptarët.”
Italia mund të jetë destinacioni i radhës për elbasanasin, i cili është shprehur se kjo lidhet edhe me periudhën e mirë që kaloi në kohën kur ishte pjesë e Lugano, që është edhe një zonë italo-folëse e Zvicrës.
“Për momentin jam shumë mirë te Legia dhe po punoj për të luajtur akoma më shumë. Ëndrra ime është që të luaj në Serinë A, kjo pasi jam i lidhur me Italinë dhe kam kaluar një periudhë mjaft të bukur, në pjesën italisht-folëse të Zvicrës, Lugano.”
Ndërsa sa i përket futbollistit më të mirë në botë, Sadiku është shprehur se më i miri është Cristiano Ronaldo edhe pse ai admiron dikë tjetër.
“Mua më pëlqen shumë Zlatan Ibrahimoviç, por Cristiano Ronaldo është më i miri në botë.”
