Instituti i Statistikave ka publikuar një raport për bujqësinë, ku rezulton se prodhimin e drithërave në vendin tonë për vitin 2016 është rritur me 0.4% krahasuar me 2015-ën.
Konkretisht, në vitin 2016 prodhimi i drithërave është rritur në 698.400 ton, ndërsa niveli më i lartë i prodhimit të drithërave u arrit në qarkun e Fierit me 156.530 ton.
Fieri pasohet nga qarqet Elbasan me 98.535 ton dhe Korça me 88.451 ton.
Për sa i përket prodhimit të perimeve, sipas INSTAT rezulton se në një vit në Shqipëri janë prodhuar 1.129.101 ton perime, duke shënuar një rritje me 9,6 %, krahasuar me vitin 2015.
Stafetën e mban sërish Fieri për nivelin më të lartë të prodhimit të perimeve, me 373.406 ton, pasuar me Tiranën me 121.661 ton dhe Beratin me 120.105 ton.
“Në grupin e perimeve peshën më të madhe e zënë perimet e njoma me 65,5 %, të pasuara nga bostanoret me 24,5 % dhe perimet e thata me 10,0 %”, shkruhet në raportin e INSTAT.
