Dita Ndërkombëtare e Punëtorëve prej vitesh e ka humbur simbolikën dhe është kthyer në një pushimi, kryesisht për punonjësit e administratës shtetërore, ndërsa në sektorin privat, jo të gjithë e bëjnë pushim.
Gjithsej, një punonjës shqiptar ka 32 ditë pushimi të paguara në vit. Sipas Kodit të Punës, në Shqipëri janë 20 ditë pune leje vjetore, apo 28 ditë kalendarike, ndërsa festa zyrtare numërohen 12.
Ditët kur festat zyrtare përkojnë të dielën, e hëna është ditë pushimi. Në përgjithësi, kompanitë e mëdha private i respektojnë ditët e pushimit, sikurse dhe administrata publike. Ndryshe ndodh me bizneset private, të cilat nuk e respektojnë tërësisht kodin e punës dhe jo të gjithë punonjësit e marrin të plotë lejen vjetore prej 20 ditësh (kryesisht jepen dy javë). Madje, shumë prej tyre detyrohen të dalin në punë edhe gjatë fundjavës. Në ditët e festave dhe të pushimit punojnë dhe të vetëpunësuarit, që përbëjnë rreth një të tretën e totalit të të punësuarve në sektorin privat.
Me 32 ditë pushimi në vit, shqiptarët renditen në mesataren e vendeve të Europës.
Sipas një harte të publikuar nga Wikipedia, në krye të klasifikimit si vend me më shumë ditë pushimi të paguara është Austria me 41 ditë, e ndjekur nga Finlanda, Franca dhe Spanja me 36 ditë pushimi. Në vend të tretë është Italia, së bashku me Gjermaninë, Zvicrën dhe Mbretërinë e Bashkuar me 32 ditë pushimi, po aq sa Shqipëria. Ndërsa Holanda ka vetëm 20 ditë pushimi të paguara.
Nga vendet e rajonit, Serbia ka 31 ditë pushimi në total, Maqedonia ka 35 ditë. Mali i Zi është shteti më punëtor në rajon me 25 ditë. Edhe në Greqi pushohet 25 ditë, shkruan Monitor.
Në botë, vendi me më shumë ditë pushimi është Sri Lanka, banorët e të cilit kanë 46 ditë pushimi në vit, ku përfshihet leja vjetore dhe pushimet.
