Prokurori i Sarandës, Sali Hasa, u pezullua me votë unanime nga Këshilli i Lartë i Prokurorisë. Prokurori u arrestua me urdhër të SPAK, së bashku me pesë persona të tjerë. Referuar hetimeve, ka rezultuar se Hasa ka pushuar akuzën e plagosjes për Emiljano Miranin, pasi ka marrë një shumë parash nga motra e tij, Elsona Papa, që po hetohet nën masën e “arrestit shtëpiak”.
Gjykata e Posaçme e la në “arrest me burg” prokurorin Hasa, ndërsa Këshilli i Lartë i Prokurorisë e ka pezulluar nga detyra.
Prokurori Sali Hasa akuzohet se ka shpëtuar nga ndjekja penale Miranin, duke i pushuar dosjen, pas ndërhyrjes së motrës së tij, e cila dyshohet se i ka dhënë atij ryshfet.
Emiljano Mirani akuzohej për “plagosje” dhe “mbajtje të armëve të ftohta”, por pas ndërhyrjes së motrës te prokurori Hasa, ai është lënë në “arrest shtëpiak”.
Hetuesit sekuestruan kompjuterin në zyrën e prokurorit Hasa, për të grumbulluar sa më shumë prova. Gjatë kontrollit në banesën e tij në Sarandë, janë gjetur edhe shuma parash.
Burimet nga grupi hetimor bëjnë me dije se në apartamentin e Sali Hasës janë sekuestruar 11 milionë lekë të vjetra dhe 2 mijë euro. Hetimet për këtë çështje vijojnë ende.
