Presidenti turk Recep Tayyip Erdogan, tha të premten se Ukraina dhe Rusia duket se kanë arritur “një mirëkuptim” për katër nga gjashtë temat e mosmarrëveshjeve të diskutuara gjatë negociatave.
Duke folur me gazetarët gjatë kthimit nga samiti i NATO-s në Bruksel, Erdogan tha gjithashtu se do të flasë me presidentin e Ukrainës, Volodymyr Zelensky të premten dhe me presidentin rus Vladimir Putin gjatë fundjavës “ose [gjatë] ditëve të para të javës së ardhshme”.
“Ka gjashtë tema të negociatave ndërmjet Rusisë dhe Ukrainës, mes tyre duket se ka një mirëkuptim për katër tema”, tha Erdogan.
“Fillimisht, Ukraina ishte mbyllur për këtë çështje, por më vonë, Zelensky filloi të shprehej se mund të tërhiqej nga anëtarësimi në NATO. Një çështje tjetër është pranimi i gjuhës ruse si gjuhë zyrtare. Këtë e pranoi edhe Zelensky. Rusishtja është një gjuhë që flitet. Pothuajse kudo në Ukrainë. As në këtë pikë nuk ka asnjë problem”, tha Erdogan.
Erdogan tha gjithashtu se komentet e Zelenskit për nevojën e një referendumi për kompromise me Rusinë, ishin “udhëheqje e zgjuar”. Zelensky tha të hënën se çdo ndryshim kushtetues që lidhet me garancitë e sigurisë në vend, do të duhet të vendoset përmes një referendumi dhe jo vetëm nga ai.
Për telefonatën e tij të ardhshme me Putinin, Erdogan tha se “duhet të diskutojmë dhe vlerësojmë” takimet e NATO-s.
“Nga ana tjetër, ne [Turqia] me siguri e konsiderojmë përdorimin e armëve të shkatërrimit në masë, si një krim kundër njerëzimit,” shtoi ai.
Burimi i lajmit: CNN. Përshtatur nga Tirana Today
