Një gjykatë në Moskë ka marrë vendim për dënimin me burgim prej 3 vjet e gjysmë për liderin opozitar, Alexsei Navalny.
Vendimi vjen në kohën e zemërimit ndërkombëtar në rritje lidhur me ndalimin që i është bërë kritikut të Kremlinit dhe pas protestave të dhjetëra mijëra rusëve në fundjavat e kaluara në gjithë Rusinë.
Prokurorët kanë pretenduar dhe gjykata është pajtuar që Navalny ka shkelur kushtet e një dënimi të vitit 2014, dhe nuk është paraqitur në gjykatë, ndonëse në atë periudhë ai ka qenë në trajtim në Gjermani.
Gjykata Evropiane për të Drejtat e Njeriut ka thënë se rasti për të cilin është dënuar Navalny, me akuza të përvetësimit, ka qenë arbitrar dhe i paarsyeshëm.
Navalny, që bën fushatë të vazhdueshme kundër korrupsionit është mbajtur në burg prej 17 janarit, kur është kthyer nga Gjermania në Moskë, pas trajtimit që ka kryer në Berlin nga helmimi për të cilin ai thotë se është urdhëruar nga Putini.