Deputetja demokrate Rudina Hajdari ka mbajtur sot një takim me zyrtarin e lartë të Departamentit Amerikan të Shtetit (DASH), Jonathan Moore. Siç shkruan Hajdari, në qendër të vëmendjes gjatë takimit ka qenë situata politike në të cilën ndodhet vendi, pas daljes së opozitës nga Parlamenti.
Ndër të tjera, deputetja e PD-së citon se qytetarët shqiptarë meritojnë dhe duhet të gëzojnë paqe sociale, rend dhe siguri, sundim të ligjit, politika afatgjata zhvilluese, progres ekonomiko-social, integritet institucional, përgjegjshmëri dhe mirëqeverisje.
Po sipas saj, aktorët politik kanë përgjegjësinë që të angazhohen një orë e më parë për të gjetur një zgjidhje politiko-institucionale afatgjatë në frymën e Kushtetutës, që të jetë e gjithëpranueshme për t’i dhënë fund krizës së paprecedentë në cilën gjendet sot Shqipëria.
