Kryetari i Kuvendit, Gramoz Ruçi deklaroi se do të tërhiqet nga politika, duke dhënë dorëheqjen nga të gjitha funksionet drejtuese në Partinë Socialiste. Gjatë fjalës së mbajtur në Kongresin e PS për 30 vjetorin e themelimit të kësaj force politike, Ruçi u shpreh se nuk kishte ditë më të mirë se kjo e sotmja, për t’u tërhequr nga politika.
Gjithashtu, ai bëri me dije se nuk do ta ushtrojë mandatin e deputetit, në legjislaturën e ardhshme të Kuvendit, që fillon më 9 shtator.
Gramoz Ruçi: ”I dashur Edi! Të kujtohet viti 2003. Ti e dije mirë që të bëhesh lider nuk mjafton vetëm ambicia por duhet edhe dashuria e atyre që pate ambicien për të qenë kryetar i tyre. Tre gjëra na karakterizojnë: Fryma, organizimi dhe lidershipi! Jemi me fat që kemi një lider me vizion. Një lider me ambicie. Lider me energji, këmbëngulës, të vendosur dhe gjithmonë i maturuar. Tre mesazhe do ta kisha: ta ruajmë këtë frymë, ta konsolidojmë këtë organizim dhe të mbështesim lidershipin e kryetarit. Së fundmi, dua të bëj një komunikim. Kur unë nisa rrugëtimin tim, 3-vjeçarët që janë këtu nuk kishin lindur akoma. Gjatë këtij mandati që po përfundojmë, me mua ka bashkëpunuar një pyetje: kur dhe ku unë Gramoz Ruçi do të deklaroj fundin e kësaj maratone. Nuk ka ditë më të mirë se sot. 30-vjetorin e PS. S’ka më mirë se sot që kemi fituar mandatin e tretë. S’ka më mirë se pas disa muajsh kam përvjetorin personal. 70-vjetorin e ditëlindjes. Në shtator nuk do të ushtroj mandatin që më ka dhënë PS.”
