Hulian Rubio është i pari dhe i vetmi spanjoll deri më sot që ka drejtuar një ekip shqiptar, ndaj askush më mirë se ai nuk e njeh futbollin tonë. Ish-trajneri i Tiranës, në një intervistë të dhënë për “Panorama Sport”, edhe pse e sheh thuajse të pamundur një ndalesë të iberikëve nga kuqezinjtë, nuk ngurron që të japë këshilla.
Sipas tij, skuadra e Panuçit nuk duhet të mbyllet në mbrojtje, pasi në të kundërt do të përsëritet ndeshja e “Loro Boriçi”-t. Rubio komenton edhe kalimin e Xhani De Biazit tek Alavesh, ndërsa zbulon se këtë skuadër e mori italiani, pasi e refuzuan 5-6 trajnerë. Sipas tij, në Shqipëri ndodh edhe diçka e pazakontë, ndërsa lojtarët që janë të grumbulluar dhe luajnë në Superiore merren vetëm për numër.
Morata, Iniesta dhe Karvahal nuk luajnë, a ia lehtësojnë punën Shqipërisë këto mungesa?
Mungesat e Moratës dhe Iniestës janë të rëndësishme, por jo deri në atë pikë sa të ndikojnë në rezultatin final. Kushdo që do të luajë, do të japë garancinë që kërkohet nga një përfaqësuese si Spanja.
A do të ishte dramë nëse Shqipëria i merr një pikë Spanjës?
Spanja ka vetëm dy opsione, Shqipërinë dhe Izraelin. I mjafton që të fitojë vetëm njërën që të kualifikohet. Por, edhe nëse humbasin, nuk mendoj se do të ishte dramë.
Sa shanse ka Shqipëria kundër Spanjës?
Unë mendoj se nuk ka shumë, pasi Spanja është shumë më superiore se Shqipëria.
Ç’mendoni për largimin e De Biazit nga stoli ynë në mes të edicionit dhe për kalimin e tij tek Alaveshi?
Nuk jam i sigurt se përse u largua De Biazi nga përfaqësuesja shqiptare, por motivet e tij sigurisht që do t’i ketë. Këtu ka marrë Alavesin, pasi 5 a 6 trajnerë refuzuan që ta merrnin. Alaves është një ekip i ri i La Ligas dhe nuk është se ka ndonjë organikë cilësore lojtarësh. Xhanin besoj se e pret një punë e madhe, ndaj do t’i uroj që të ketë sa më shumë fat.
Te Tirana shquheshit si një trajner që bënit mrekulli kur ekipi ishte në vështirësi. A keni ndonjë këshillë për t’i dhënë Panuçit se si mund të ndalet Spanja apo nuk jua bën zemra?
Për të luajtur ndaj ekipeve të mëdha, të një niveli si Spanja, nuk duhet vetëm që të mbrohesh. Duhet që ta përgatisësh ndeshjen mirë edhe për të sulmuar dhe jo vetëm që të qëndrosh me 11 lojtarë prapa. Dhe nëse Shqipëria përsërit ndeshjen e Shkodrës, ku më shumë u mbrojtën, do të vijë një moment që do ta pësojë. Dhe nëse kjo ndodh, pjesa e mbetur e lojës kthehet në një shëtitje për spanjollët dhe vuajtje për përfaqësuesen shqiptare.
A do të ndikojë atmosfera e krijuar për shkak të referendumit në Katalonjë?
Katalonja është larg nga Alikante, ndaj nuk do të ndikojë aspak. I vetmi që do ketë probleme do të jetë Pike…
Sa nga lojtarët e Shqipërisë njihni dhe cili prej tyre ju bën më shumë përshtypje?
Xhani De Biazi krijoi një grup shumë të mirë lojtarësh me origjinë shqiptare, por të gjithë jo vetëm që luajnë, por janë trajnuar në Europë. Është një zgjedhje e pazakontë, pasi nuk ka produkte vendëse, prej Kategorisë Superiore. Përfaqësuesja kuqezi nuk ka kurrfarë lidhje me nivelin e futbollit që luhet në Shqipëri. Edhe ata 2-3 lojtarë që grumbullohen, merren vetëm për simbolikë.
Kujt duhet t’i druhet më shumë Shqipëria në ndeshjen me Spanjën?
Një përfaqësuese si Shqipëria meriton pa dyshim respekt, por frikë… kurrë.
Kalojmë pak te Tirana. Sa e keni ndjekur në Kategorinë e Parë dhe ç’mendim keni për ecurinë e saj?
E ndjek me aq sa mundem. Është e vështirë që ta shoh, paçka se kam shumë dëshirë, pasi ka pak informacion. Gjithsesi, jam në dijeni që i ka fituar të gjitha ndeshjet, është në krye të renditjes dhe po luan shumë mirë. E gjithë kjo situatë më bën që të gëzohem, pasi unë jam një tifoz më shumë i Tiranës dhe më pëlqen çdo gjë rreth këtij klubi.
Çfarë note do t’i vinit Ze Marias deri tani?
Nuk e di se si punon Ze Maria, pasi kurrë nuk e kam parë. Ajo që është e rëndësishme dhe flet vetë, lidhet me rezultatet dhe lojën e mirë. Shpresoj që të ngjiten aty ku e kanë vendin, në përfundim të këtij sezoni në Kategorinë e Parë. I uroj më të mirat Tiranës dhe Ze Marias.
Çfarë qyteti është Alikante dhe çfarë ju ka bërë më shumë përshtypje nga stadiumi i atij qyteti nëse e keni vizituar ndonjëherë?
Alikante është një qytet shumë i bukur bregdetar. Ka klimë mesdhetare dhe plazhe shumë të mëdha dhe me një turizëm të madh kombëtar dhe ndërkombëtar. Stadiumi pastaj është i bukur dhe komod. Klubi i këtij qyteti tani luan në Kategorinë e Tretë, që këtu në Spanjë quhet 2-B. Ka qenë shumë herë në Primera Divizion, duke u renditur nga mesi i tabelës e poshtë.
Kam luajtur shumë herë në “Riko Perez”, pasi kështu quhet stadiumi, në kohën kur isha futbollist, por e kam vizituar edhe si trajner. Do të ketë një atmosferë të mrekullueshme të premten dhe me një stadium të tejmbushur, paçka se shumica e njerëzve do të merren më shumë me Piken.