Radio Televizioni Shqiptar nuk do të pranojë material të gatshëm të partive politike për emisionet e veta informative.
Pas projektligjit të marrëveshjes Rama-Basha për transmetimet e reklamave gjatë fushatës, reagon edhe Televizioni Publik Shqiptar.
Radio Televizioni Shqiptar përmes një shkrese njofton se nuk do të pranojë, në edicionet e veta të lajmeve, materiale të gatshme të partive politike pjesëmarrëse në zgjedhjet e afërme elektorale, por do mbulojë fushatën zgjedhore vetëm me gazetarët e vet.
Kjo në fakt duket një risi e televizionit publik, pasi vitet e fundit zyrat e shtypit të institucioneve kanë nxjerrë në ‘pension’ gazetarët duke dërguar në redaksi materiale të gatshme filmike dhe tekst.
RTSH, përmes një shkrese të firmosur nga Drejtori i Përgjithshëm, Thoma Gëllci, njofton kryetarët e partive pjesëmarrëse në zgjedhje se pasqyrimi i aktiviteteve të partive politike do të bëhet në mënyrë të pavarur dhe profesionale nga vetë gazetarët dhe operatorët e RTSH-së.
Më herët Këshilli Drejtues i Radiotelevizionit Shqiptar miratoi parimet e veta editoriale duke shënuar kështu një kthesë nga ‘tradita’ e televizionit publik që do të ishte mirë të ndiqej edhe nga mediat e tjera.
