Kreu i Bashkisë së Durrësit, Vangjush Dako ka reaguar pas deklaratës së Astrit Avdylit, i cili bërtiti sot në gjykatë me fjalët: “Rroftë Dako, rroftë PS-ja, aty i qaj hallet!”
Duke u fokusuar më shumë tek deklarata e deputeti demokrat Luçiano Boçi, Dako është distancuar nga thirrjet e të arrestuarit, ndërsa ka shtuar se do të padisë Boçin.
“Sot ka dalë Luçi dhe përveç avazit të dosjes 399 paska folur i emocionuar nga deklarata e njërit nga Avdylajt në gjyq.. Për të qarë dhe për të qeshur edhe Avdyli edhe Luçi edhe Lul Peshku bashkë! Ky Luçiano më mungonte në listën e gjyqit dhe do futet sot direkt”, shkruan ndër të tjera Dako.
Postimi i plotë:
“Asnjëherë s’e kam kuptuar dot si mund të ketë qenë pedagog një njeri kaq qesharak sa Luçiano Boci! Sot ka dalë Luçi dhe përveç avazit të dosjes 399 paska folur i emocionuar nga deklarata e njërit nga Avdylajt në gjyq.. Për të qarë dhe për të qeshur edhe Avdyli edhe Luçi edhe Lul Peshku bashkë!
Njëri del ne gjyq dhe mirë që nuk kërkoi edhe krehër para pushkatimit të togës gjermane.. Tjetri del tek partia dhe kërkon llogari nga unë për një deklaratë qesharake që flet vetë më shumë se çdo koment për autorin! Ky Luçiano më mungonte në listën e gjyqit dhe do futet sot direkt, po ndërkohë po i çoj dhe një disk të Ribla Çorbes se ky është si tip këngëtari jugosllav nga ata të kabareve komuniste!”.
Kujtojmë se prej ditësh Partia Demokratike kërkon nga prokuroria arrestimin e Vangjush Dakos, duke u bazuar në përgjimin e publikuar, ku Dako bisedon me Avdylajt. Kryebashkiaku i Durrësit akuzohet nga opozita se ka bashkëpunuar me grupe kriminale për blerjen e votave.
