Gazetari investigativ Artan Hoxha, ka pohuar se pas hakerimit të të dhënave të shqiptarëve qëndrojnë iranianët. Marrë shkas nga emailet e ish-Drejtorit të Përgjithshëm të Policisë, Gledis Nano, gazetari Hoxha duke folur në “Opinion” tha se ai është targetuar nga hakerat për shkak të pozicionit të tij në të shkuarën në krye të antiterrorit. Ai tha se Gledis Nano, duke qenë drejtor i antiterrorit dhe ka patur lidhje me aleatët, përmes tij kalonin informacionet që lidheshin edhe me iranianët.
Blendi Fevziu: Çfarë ka ndodhur?
Artan Hoxha: Nuk është hera e parë gjatë këtij viti që ndodhemi në këtë situatë të ngjashme. E njëjta gjë ka ndodhur dhe me çështjen e Nuredin Dumanit, ku të dhënat sensitive të deklarimeve të tij, dolën në media. Dua t’i filloj nga niveli politik i dëshmisë së tij, ishte problem i madh dhe aty u ndaluam. Informacioni që ai kishte dhënë duhet verifikuar, duhet publikuar. Në raste të tilla, askush nuk i ndalon palët e interesuara që të interferojnë.
Blendi Fevziu: Dy e-maile kanë dalë. Pse janë publikuar? Janë informacione zyrtare në këtë rast, nuk janë informacione të rrjedhura në media.
Artan Hoxha: Në mos gaboj, në datën 21 korrik, kam bërë një dalje në lidhje me këtë histori dhe që në atë kohë pata informacionet për hakerat dhe që në atë kohë isha i bindur, që pas kësaj ishte Irani sepse ka interesa direkte në territorin e Shqipërisë. Ajo që më shqetëson është se autoritetet tona na kanë gënjyer që nga periudha korrik, gusht dhe shtator. Nga ato të dhëna që unë kam parë deri tani, po marr rastin e parë, bëhet fjalë për Talo Çelën.
Blendi Fevziu: Që ju më keni thënë që ai nuk gjendet më, më keni thënë?
Artan Hoxha: E kam thënë në fillim të këtij viti, në e-malin që është publikuar bëhet fjalë për gushtin e vitit të kaluar, ai ishte ende në qarkullim. Ai ishte një informacion që i shkon drejtuesit të lartë të policisë, po nuk është informacion 100 % i vërtetë. Ai informacion shkon dhe policia mbi atë informacion bën verifikimet e veta. Problemi është që në atë informacion aty thuhet se personi ka shkuar në një hotel, jepet hoteli tek “Rruga e Dibrës”, lidhet me shtetasin Ervin Mataj.
Blendi Fevziu: Deri më sot, nuk ishte thënë që Talo Çelo dhe Ervin Mataj kishin lidhje mes tyre?
Artan Hoxha: Pikërisht. Aty thuhet se burimi është i sigurtë që kjo ka ndodhur, por nuk ka elementë. Policia mbi këtë informacion fillon verifikimet e veta. Policia duhet ta çojë në instancat e duhura të cilat ta verifikojnë.
