Prej mbrëmjes së djeshme, i gjithë territori i Shqipërisë vijon të jetë i pushtuar nga masa ajrore të ftohta, me vranësira në shumicën e vendit dhe reshje me intensitet të lartë, mbi të gjitha në zonat malore. Dy persona rezultojnë të zhdukur prej mesditës së 20 nëntorit, pasi vetura ku po udhëtonin u mor nga rrjedha e ujit në vendin e njohur si “Grykë Lugje”.
Sipas njoftimeve zyrtare nga Policia e Shkodrës, rrjedha e ujit të përroit ka marrë përpara një automjet me të cilin udhëtonin tre persona, banorë të zonës, babai, djali dhe vajza. Në momentin që rrjedha e ujit ka marrë përpara automjetin që drejtohej nga shtetasi P. R., rreth 50 vjeç, vajza ka mundur të dalë dhe është ndihmuar nga një banor i zonës. Ajo ndodhet jashtë rrezikut për jetën, ndërsa babanë e vajzës dhe vëllanë e saj i ka marrë rrjedhja e ujit. Ditën e sotme do të nisin kërkimet me dron për të bërë të mundur gjetjen e makinës së Rushajt.
Malësi e Madhe, Shkodër/Informacion paraprak
Shërbimet e Komisariatit të Policisë Malësisë e Madhe kanë marrë informacion se në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit kishte marrë përpara një automjet me të cilin udhëtonin tre persona, banorë të zonës, (babai, djali dhe vajza).
Në momentin që rrjedha e ujit ka marrë përpara automjetin që drejtohej nga shtetasi P. R., rreth 50 vjeç, vajza ka mundur të dalë dhe është ndihmuar nga një banor i zonës. Vajza ndodhet jashtë rrezikut për jetën, ndërsa babanë e vajzës dhe vëllanë e saj i ka marrë rrjedhja e ujit.
Në vendngjarje ndodhen polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, të cilët po punojnë për gjetjen e dy shtetasve (babë e bir).
