Koronavirusi vazhdon të përhapet me shpejtësi në Kinë. Vetëm brenda 24 orëve të fundit janë shënuar 57 viktima të tjera, duke e çuar në 362 numrin total të viktimave. Gjithashtu është rritur edhe numri i të prekurve. Komisioni Kombëtar i Shëndetësisë në Kinë raporton se numri i të prekurve ka arritur 17205, rreth 2 mijë më shumë nga raportimi para 24 orëve.
Në Kinë raportohet se mbi 70 milionë persona janë në karantinë, ndërsa popullata e qyteteve të prekura vijon të përballet me mungesën e produkteve ushqimore teksa ditët kalojnë, pasi tregjet publike janë të mbyllura.
Sakaq, qeveria kineze premtoi se do të ofrojë ndihmë për prodhuesit e produkteve jetike, në mënyrë që të mos ketë krizë të ushqimit, shkruan “Reuters”.
Deri tani janë të paktën 171 raste jashtë Kinës, në shtete si Shtetet e Bashkuara, Japoni, Tajlandë dhe Britani e Madhe.
