Numri i personave të shëruar nga koronavirusi në Kosovë është rritur duke shkuar në 23.
Mirëpo edhe numri i të infektuarve me COVID-19 është rritur.
Instituti Kombëtar i Shëndetit Publik ka njoftuar se janë konfirmuar edhe pesë raste të tjera të të prekurve me koronavirus, duke e çuar numrin total në 140.
Naser Ramadani nga Instituti Kombëtar i Shëndetit Publik në Kosovë, ka deklaruar se tre javët e ardhshme janë kritike për sa i përket shpërthimit të rasteve me COVID-19.
Ai iu bëri thirrje qytetarëve të qëndrojnë në shtëpi, të kujdesen për higjienën personale dhe t’iu përmbahen rekomandimeve të institucioneve të Kosovës.
Ramadani pohoi se qytetarët duhet të mbajnë distancë fizike prej dy metrash, në mënyrë që të parandalojnë përhapjen e virusit: “Apeloj që këto tri javë mos të tubohen, të qëndrojnë në shtëpi sepse do të kalojë sa më lehtë që është e mundur nëse i përmbahen rekomandimeve të Institutit të Shëndetësisë”.
