Rritet interesi i shqiptarëve për shfaqjet kulturore.
Edhe pse numri i shfaqjeve kulturore në tremujorin e tretë të 2017 është thuajse i njëjtë me ato të së njëjtës periudhë të një viti më parë, duket se qytetarët kanë më shumë interes për t’i parë ato.
Kështu rezulton sipas një raporti të publikuar nga INSTAT, ku shkruhet se numri i spektatorëve në tremujorin e tretë 2017 është rreth 17 mijë, duke pësuar rritje me 34,6 %, krahasuar me të njëjtën periudhë të një viti më parë.
Pjesëmarrja mesatare në tremujorin e tretë 2017 është 268 spektatorë/vizitorë për shfaqje, dhe ka pësuar rritje me 32,6 %, krahasuar me tremujorin e tretë 2016.
Më së shumti, qytetarët kanë shfaqur interes për Galerinë Kombëtare të Arteve, teksa vetëm në tremujorin e tretë numërohen 4633 vizitorë, institucion ky i ndjekur nga Teatri Kombëtar i Operas, Baletit dhe Ansamblit Popullor.
Numri i vizitorëve në muze në tremujorin e tretë 2017 është 78.479, duke shënuar rritje me 20,8 %, krahasuar me tremujorin e tretë 2016. Në kala e monumente të tjera, numri i vizitorëve ka një rritje prej 18,6 %, midis tremujorit të tretë 2017 dhe të njëjtit tremujor në vitin 2016. Në tremujorin e tretë 2017 numri i vizitorëve në parqe arkeologjike është 150.859, me një rritje prej 9,2 %, krahasuar me të njëjtën periudhë të vitit të mëparshëm.
Numri i shërbimeve të njësive bibliotekare dhe numri i frekuentuesve të Bibliotekës Kombëtare në tremujorin e tretë 2017 është përgjysmuar krahasuar me tremujorin e tretë 2016. Në tremujorin e tretë 2017, në Bibliotekën Kombëtare janë afishuar 2.851 botime, 0,1 % më shumë, në krahasim me të njëjtën periudhë të vitit të kaluar. Nga këto botime 609 ishin tituj të rinj dhe 2.242 ekzemplarë të rinj. TIRANA TODAY
