Kreu i shoqatës së transportit urban, Rixhin Qosja, është shprehur se ende nuk ka një datë fikse për rifillimin e transportit urban.
I ftuar në emisionin “Ditë e Re” në Ora News, Qosja sqaroi se nuk do të ketë një rritje të çmimit të biletave. Ai shpjegoi edhe procedurat se si do të veprohet, në kuadër të masave për frenimin e përhapjes së koronavirusit.
Qosja theksoi se në një mjet transporti publik nuk do qarkullojnë dot më shumë se 25 ose 30 persona në të njëjtën kohë.
Pjesë nga intervista:
A ka ndonjë plan që ka dalë se kur do hapet transporti?
“Konkret jo, Bashkia e Tiranës në bashkëpunim me Ministrinë e Infrastrukturës janë në kontakte për të gjetur këto modalitetet e fundit, për protokollin e sigurisë, për mënyrën e operimit, skemën financiare që do funksionojë ky shërbim sepse është shumë e rëndësishme dhe unë shpresoj të përfundojë sa më shpejt të jetë e mundur. Një datë fikse nuk di ta them për momentin, por diskutohet për ditët e fundit”.
Cilat janë masat e sigurisë që pretendohen se do merren?
“Ne jemi munduar të adaptojmë ato protokolle sigurie që ka bërë edhe Europa dhe Kosova. Në një mjet transporti publik nuk do qarkullojnë dot më shumë se 25 ose 30 persona në të njëjtën kohë”.
Kush është maksimumi i kapacitetit?
“Në një mjet urban që është 12 metra i gjatë qëndrojnë ulur dhe në këmbë 100 pasagjerë, ndërsa tani mendohet të reduktohet në 25-30”.
A do të përkëthehet kjo në një rritje çmimi apo kostoja do vazhdojë të jetë e njëjtë?
“Të vetmen gjë që nuk e kemi kërkuar është rritja e çmimit. Sepse edhe po të rritet çmimi nuk do mund ta kompesojë dot humbjen që ne do gjenerojmë nëse dalim në punë si normalisht. Sepse të transportosh 30% të kapacitetit do të thotë që është humbje çdo ditë. Kështu që ne kemi kërkuar disa mënyra të tjera për të bërë që ky shërbimi të mbijetojë”.
Cilat janë këto mënyra?
“Ne kërkojmë mbështetje financiare si nga Bashkia e Tiranës si nga qeveria që ne të arrijmë të mbijetojmë nga kjo situatë. Nuk po flasim për fitime, por ne duhet të mbijetojme në mënyrë që shërbimin ta ofrojmë dhe për më tepër edhe për stafin tonë që janë 1500 veta në Tiranë që janë pa punë”.
