Kryeministri kanadez Justin Trudeau ishte i pari i cili hodhi akuza të forta se Irani kishte sulmuar avionin ukrainas duke u bazuar në prova të shërbimeve të inteligjencës.
Tashmë që Irani e ka pranuar sulmin, Trudeau ka reaguar duke theksuar se ndihet i zemëruar dhe i zhgënjyer.
Ai ka deklaruar se nuk do të ndalet derisa të gjejë drejtësi.
“Ajo që Irani ka pranuar është shumë e rëndë. Të rrëzosh një aeroplan civil është e tmerrshme. Irani duhet të marrë përgjegjësinë e plotë. Kanadaja nuk do të pushojë derisa të marrim përgjegjshmërinë, drejtësinë dhe përfundimin që familjet meritojnë. Unë jam i inatosur që ka familje kanadeze që kanë humbur prindërit e tyre, fëmijët e tyre, bashkëshortët e tyre. Ky është një incident vërtet i tmerrshëm dhe jam i zemëruar, jam i zhgënjyer, por jam i vendosur plotësisht për të marrë përgjigje dhe kompensim dhe ndihmë dhe drejtësi për viktimat”, tha Trudeau.
Kujtojmë se nga sulmi i avionit në Teheran mbetën të vdekur mes 176 viktimave edhe 63 kanadezë.
