Pas një zhurme të madhe politike dhe mediatike, erdhi edhe arrestimi i djalit të deputetit të PS, Rrahman Rraja. Përdhunuesi dhe dhunuesi i Xhisiela Malokut, shtetasi Rexhep Rraja, u prangos një ditë më parë, dy muaj pasi ishte denoncuar për ushtrim të marrëdhënies seksuale me dhunë, përdhunim, dhunim, torturë, kërcënim me armë pa leje, rrëmbim dhe përndjekje.
Ishte policia e Krujës që ekzekutoi vendimin e marrë më herët nga gjykata e këtij qyteti, pas një kërkese të prokurores Mirela Kapo, e cila po heton çështjen e dhunimit të 25-vjeçares Xhisiela Maloku. Arrestimi i 24-vjeçarit u njoftua zyrtarisht edhe nga policia e Krujës, me anë të një njoftimi, ku citohet vetëm një akuzë.
“Specialistët e Komisariatit të Policisë Krujë, në bashkëpunim me Forcat Operacionale të Drejtorisë Vendore të Policisë Durrës, bënë kapjen me qëllim ekzekutimin e Urdhrit të Prokurorisë Krujë, mbi bazën e Vendimit të Gjykatës së Rrethit Gjyqësor Krujë, nr.189 dt. 29.09.2018, e cila ka vendosur masën e sigurisë “Arrest me burg” për shtetasin Rexhep Rraja, 24-vjeç, banues në Krujë. Ai akuzohet për veprën penale “Përndjekja”, parashikuar në nenin 121/a të Kodit Penal. Materialet i kaluan Prokurorisë së Rrethit Gjyqësor Krujë për veprime të mëtejshme”, thuhet në njoftimin e policisë.
Torturimi që ai i ka bërë vajzës së re në dhomën e një hoteli, u faktua edhe nga ekspertiza mjeko-ligjore. Ndaj, pse mungon akuza për “ushtrim dhune” ndaj djalit të deputetit?
Ish-oficeri Emiljano Nuhu akuzoi deputetët Rahman Rraja e Taulant Balla, dhe funksionarë të tjerë të lartë për mbrojtjen e dhunuesit dhe kërcënimin e viktimës, për të mos hetuar e bërë publik krimin.
Prangosja e Rrajës u bë vetëm me akuzën e “Përndjekjes”, e cila parashikon dënim nga gjashtë muaj, deri në tre vjet burg. Ndërkohë, akuzat për të cilat ai ishte denoncuar parashikojnë dënime më të ashpra: marrëdhënie seksuale me dhunë dënohet me pesë deri në dhjetë vjet burgim, dhuna dhe tortura dënohet me katër deri në dhjetë vjet burg, kurse armëmbajtja pa leje dënohet nga gjobë deri në dy vjet burg.
Rasti u bë publik vetëm para pak ditësh, ndonëse ngjarja kishte ndodhur që më 21 korrik të këtij viti, kohë kur Xhisiela kishte denoncuar rastin në Stacionin e Policisë së Fushë-Krujës.
Vlen të theksohet fakti se aktualisht nuk është ndërmarrë asnjë masë ndaj deputetëve Rraja dhe Balla dhe funksionarëve të tjerë shtetërorë të akuzuar nga Nuhu.
TIRANA TODAY
