Rritet numri i personave që kanë kërkuar ndihmë mjekësore për shkak të temperaturave të larta në Kosovë.
Në vetëm dy muaj (qershor dhe korrik) në Klinikën Emergjente, në Qendrën Klinike Universitare të Kosovës, kanë kërkuar ndihmë rreth 10 mijë persona.
Basri Lenjani, drejtor i Qendrës Emergjente, tha se ndërlikimet shëndetësore nga temperaturat e larta janë shfaqur tek personat me sëmundje kronike, ata me sëmundje kardiologjike, gratë shtatzëna etj.
“Vetëm për muajin qershor mbi 4800 pacientë kanë kërkuar ndihmë mjekësore, derisa numër rekord ka shënuar muaji korrik, ku ende pa përfunduar muaji, janë lajmëruar mbi 5 mijë raste.
Të gjitha këto raste që kërkojnë ndihmë janë të ndikuara drejtpërdrejt nga i nxehti, dhe këshilla jonë është që nga ora 11:00 deri në orën 17:00, njerëzit të mos u ekspozohen rrezeve të diellit”, tha Lenjani për REL.
Ndërkohë, sipas doktorëve, vihet re një numër i shtuar i pacientëve me probleme kardiake.
“Me ngritjen e temperaturave, sidomos javën e fundit njerëzit me sëmundje kronike janë prekur shumë. Në kardiologjinë invazive me prekje infarkti nuk ka numër të shtuar, por në vizita ambulatore është shtuar fluksi i pacientëve dukshëm”, thotë doktori Basri Sejdiu.
