Pas dorëzimit të mandatit të këshilltarit bashkiak të Partisë Demokratike, Fabian Topollaj bën thirrje që edhe anëtarët e tjerë të bëjnë të njëjtën gjë. Kjo sepse sipas tij është e vetmja mënyrë për të përfaqësuar ata që e kanë zgjedhur.
Nëpërmjet një postimi në Facebook, Topollaj rendit disa nga arsyet që e bënë të merrte këtë vendim, ku ndër të tjera citon politikën manipuluese që sipas tij përdor Erion Veliaj dhe pengesa që i ka bërë Partia Demokratike për të bërë detyrën e opozitarit.
“Unë mendoj që largimi nga institucionet është e vetmja formë që i ka mbetur çdo këshilltari të opozitës për të përfaqësuar zgjedhësit e vetë. Përballë unë kam pasur një njeri i cili ka arritur të korruptojë pothuajse të gjithë sistemin mediatik, politik, shoqëror dhe gjyqësor. Por, kjo do të ishte vetëm gjysma e të keqes nëse në krah do të kisha një formacion politik, i cili e ka seriozisht për t’i dhënë fund kësaj të keqe. Sepse është një e keqe shumë e madhe”, shprehet Topollaj.
Në një intervistë për Tirana Today, ish-përfaqësuesi i Partisë Demokratike flet për situatën në të cilën ndodhet opozita. Ku sipas tij është e papranueshme që kjo e fundit mbështet përfaqësuesin kryesor të mazhorancës në bashkinë më të madhe, Erion Veliajn.
Tirana Today- Kur ju thoni që Partia Demokratike iu ka penguar, për çfarë e keni fjalën?
Topollaj- “Opozita formale nuk është duke bërë realisht punën e saj. Arsyet mund të jenë të shumta, një është paaftësia por edhe kompromentimi që mund të ketë opozita. Unë nuk e imagjinoj dot që drejtues të opozitës vetëm 6 muaj larg zgjedhjeve lokale, të dalin publikisht dhe të mbrojnë kandidatin kryesor të qeverisë në bashkinë kryesore të vendit. Kryetarja e LSI-së publikisht gjatë kësaj periudhe ka mbrojtur Erion Veliajn.
Opozita aktuale më tepër duket sikur pret t’i vij radha për të ardhur në qeverisje dhe për të shfrytëzuar maksimalisht këtë sistem. Dhe jo të të përfaqësojë interesin e qytetarëve.”
Tirana Today- Pas dorëzimit të mandatit tuaj, patët një reagim nga z.Basha?
Topollaj- “Nuk mbaj kontakte me z.Basha. Nuk ishte e nevojshme të më pyeste. Unë arsyet pse e lashë mandatin i kam bërë publike dhe nuk ka pasur arsye pse z.Basha të ketë qenë i paqartë.”
Tirana Today- Ju thoni që anëtarësia e PD-së, nuk e do kryetarin e vetë. Ku e bazoni këtë gjë?
Topollaj- Zgjedhjet që bëri z.Basha brenda partisë për atë që ai e quan proces i rikonfirmimit në krye të PD-së; kanë qenë zgjedhje me një pjesëmarrje jashtëzakonisht të ulët të anëtarësisë së Partisë Demokratike. Fakti që pjesa dërrmuese e demokratëve nuk u paraqitën tregon refuzimin e tyre për mënyrën sesi po bëhen gjërat në këtë parti. Partia Demokratike qëllimin tani ka që ajo të drejtohet nga z.Basha. Dhe për mua ky është një gabim gordian, i cili nuk mund të ndreqet.
Tirana Today- Nëse do të largohej z.Basha nga kryesia e Partisë Demokratike, sipas jush cili duhet të marr drejtimin?
Topollaj- “Kjo botë nuk mund të fillojë e mbarojë me një emër të vetëm, siç është Lulzim Basha. Unë nuk mendoj që ka një që mund ta zëvendësojë dhe ta bëjë punën shumë mirë. Unë mendoj që ka shumë njerëz të aftë për të drejtuar opozitën. Nuk kam ndonjë emër konkret, pasi kjo është një lojë politike.
Nëse do të jem përballë një situate që do të duhet të zgjedh me votën time drejtuesin e opozitës, unë sigurisht do të shoh se kush vetëoforohet dhe do të zgjedh atë që është më i miri. Por, problemi është se ne nuk jemi në një situatë të tillë. Ne jemi në situatën që në Partinë Demokratike nuk ka më zgjedhje. Lulzim Basha kërkon ta ketë të gjithën për vete.”/ TIRANA TODAY
