Mediat në Kosovë i kanë bërë jehonë historisë së grave të kthyera nga Siria pak javë më parë. Njëra prej tyre ka rrëfyer se si u mashtrua, dhe pranoi të largohej në Siri.
Një femër kosovare, e cila është pjesë e grupit të fundit të të kthyerve muajin e kaluar nga Siria në Kosovë, ishte rekrutuar para katër viteve nga disa vajza kosovare, për t’iu bashkëngjitur organizatës terroriste ISIS.
Atje ajo u ballafaqua me realitetin e tmerrshëm. Shkoi si beqare dhe më pas u martua e lindi tre fëmijë brenda katër viteve, shkruan sot gazeta “Zëri”. Avokatja e saj ka rrëfyer gjithçka ka ndodhur, dhe si është mashtruar klientja e saj për një jetë më të mirë.
“E mbrojtura ime ka shkuar në Siri si viktimë e disa vajzave, të cilat e kanë ftuar për të shkuar atje, duke i thënë se atje është jeta e mirë dhe se nuk ka nevojë të brengosesh absolut për asgjë, e sidomos për gjëra materiale.
Ajo është mashtruar nga këto fjalë dhe ka shkuar. Kur ka shkuar atje, gjendja faktike ka qenë krejtësisht ndryshe. Ka parë se është luftë, pastaj për shkak të luftës vazhdimisht ka ndërruar vendbanim.
Është përpjekur të kthehet në Kosovë, por nuk ka mundur”, ka deklaruar për “Zërin” avokatja Marigona Shabani.
Më 20 prill 2019, nga Siria u kthyen 110 shtetas kosovarë, prej të cilëve 32 gra, 74 fëmijë dhe 4 burra luftëtarë që kishin qenë pjesë e organizatave terroriste në Siri.
