Mbrojtësi i Tiranës Gentian Muça, në një intervistë për ‘Procesin Sportiv’, ka rrëfyer historinë e tij se si ia ka dalë të mundë një sëmundje vdekjeprurëse dhe madje, duke u rikthyer sërish në fushën e blertë.
Muça tha se kishte probleme me këmbën ku u zbulua një masë tumorale. Gjendja nuk ishte aspak e mirë, duke mos i dhënë shpresa, por ai arriti që ta mposhtë atë.
“I pari që e merr vesh është pacienti. Më thanë që jam sëmurë dhe më dhanë diagnozën e saktë që ishte masë tumorale. Kur ua kam thënë të tjerëve, jam munduar që ta zbus. Jo se jam unë i fortë, por e kam mbajtur vetë peshën, pasi familja e vuan më shumë. Kismeti është i Zotit dhe falë besimit e mbështetjes kam qenë më i fortë. Në fillim më kanë shtyrë të mendoja për futbollin dhe kishte gjëra më të rëndësishme. I kam thënë vetes, pse jo? Përveç klubit ka pasur sensibilizim nga shumë ekipe, si Korça, Teuta, Shkodra dhe po rrëfej se kam pasur mbështetje morale dhe financiare dhe nga Partizani. Në maj, kur kam bërë vizitën e fundit pas 6 muajsh kimioterapi dhe radioterapi më thanë se kocka ishte pastruar. Në tetor përfundoi gjithçka. Duket e largët, por i kam akoma të freskëta momentet. Ndonjëherë i kujtoj edhe pse nuk i pëlqejnë familjes, për të treguar se njeriu mban shumë. Ishte moment emocionues pasi ishin 2 vite pa shkelur në fushën e blertë. Ishte çështje kritike dhe nuk kisha kohë për të pasur emocione”.
“Përtej mjekimeve, djalin e solli Zoti si ilaç në momentin e duhur dhe mezi po pret të shohë babin në fushë”, u shpreh Muça.
