Ish-kryeministri i Kosovës Ramush Haradinaj ka bërë një rrëfim të trishtë që lidhet me ekzekutimin e bashkëluftëtarëve të tij.
Në një intervistë për emisionin “Tempora”, Haradinaj rrëfen kujtime nga lufta kundër ushtrisë serbe.
Haradinaj tregon nisjen e luftës frontale në Deçan, që sipas tij ishte një nga epiqendrat e luftës.
“Kosova nuk është vetëm vetvetja, por e gjithë bashkëkombasve. Rruga jonë për liri ka pasur sakrificë të madhe, një pjesë e tyre janë dëshmorë. Me disa prej tyre jam rritur. Historia e kësaj vendvarreze është se në gusht të vitit 1998, tre bashkëluftëtarë të mi janë vrarë këtu në shkollën e fshatit.
Kur mbyllëm ditën e luftimit nuk munda t`i lija trupat e tyre ashtu dhe shkova i mblodha me batanije sepse trupat ishin djegur nga predha.
I kemi mbledhur dhe i kemi sjellë këtu. Nga trupat e tyre dilnin insekte, të cilët mu ngjitën dhe mua. Pasi i solla trupat te varrezat, kam vrapuar drejt lumit të lahem. Këtu ku ndodhemi ka qenë një nga epiqendrat e luftës. Këtu ka filluar në 24 mars 1998 lufta frontale dhe ka zgjatur deri në qershor”, tha Haradinaj.
