Ka qenë pa fat në aventurën e tij në Premier League deri në këto momente, por duket se javë pas jave Alvaro Morata është duke gjetur formën e dukur. Spanjolli ka treguar tek Juventusi se është një sulmues i rrezikshëm dhe këtë kërkon të bëjë edhe tani me Sarrin. Në sezonin që lamë pas me Conten ai arriti të shënojë 16 gola në 48 paraqitje, pasi kaloi edhe një dëmtim të rëndë që e mbajti disa kohë jashtë fushave. Për “Mundo Deportivo” ai ka folur për disa aspekte të jetës së tij, jashtë dhe brenda fushës.
“Kam mësuar shumë nga sezoni i fundit sepse ishte një vit i vështirë. U largova nga shtëpia për të luajtur në Kupën e Botës dhe në fund isha jashtë. Kam mësuar shumë nga këto gjëra. Me ardhjen në jetë të fëmijëve të mi, mësova të kontrolloja emocionet, si negative edhe pozitive”, shprehet fillimisht Morata.
“Jam një person më i lumtur sot. Kur luaj dua të shënoi gola sepse ato më bëjnë mua të lumtur. Tashmë situata është e qetë, edhe pse kam kaluar gjëra shumë të këqija. Kur erdha këtu në Londër, shënova 7 gola në shtatë ndeshje dhe tifozët folën për mua, të gjithë më donin. Më pas u dëmtova dhe gabova që luajta me dhembje”, sqaron sulmuesi.
“Niveli im i tensionit ishte i lartë dhe gjyqtarët më ndëshkonin. Unë nuk flisja me askënd, derisa gruaja imë më thoshte se jam duke gabuar. Isha i zemëruar dhe mendova se të gjithë ishin kundër meje. Futbollistët kanë probleme si të gjithë njerëzit. Kur ke para edhe famë kjo mund të bëhet edhe më shumë problem. Ka shumë njerëz që mendojnë se jetët tona janë për tu pasur zili. Paratë ndonjëherë mund të sjellin problem.
Ka ditë kur dua të dal të pi një birrë por marr 300 telefonata sepse duan të bëjnë foto. Instagrami tregon një lumturi të rreme. Ka ditë kur jeni i trishtuar dhe vendosni një fotografi sikur jeni i lumtur. Kjo na bën të humbasim vlerën, sepse e gjithë rëndësia është reklamimi.”
