Ai do të mbahet mend për blerjet e bujshme që bëri tek Milani me një kosto të ulët financiare. Por tani, Adriano Galliani është senator i partisë “Forza Italia” dhe është rikthyer të flasë për vitet kur ishte pjesë e futbollit në mikrofonin e “Deejay Football Club”, program radiofonik që transmetohet në Radio “Deejay”.
Në fillim, e nis nga superndeshja Juventus-Napoli. “Është një kryendeshje, flas shpesh me Allegrin, e kam zgjedhur unë. Është solid, i fortë dhe po tregon potencialin e tij të vërtetë me atë që ka bërë gjithë këto vite me Juventusin dhe Milanin (në 4 sezone me Milanin është kualifikuar rregullisht deri në çerekfinale të Champions League), – thotë Galliani.
“E mbaj mend, që asokohe e kishte shkarkuar Cagliari dhe miku im Cellino e rimori në punë për të më vënë në siklet, por më pas e la të lirë. Ju zbuloj një prapaskenë që nuk e kam thënë më parë. E çova për herë të parë Allegrin e vilën Arcore për bekimin apostolik të Berlusconi-t ekzaktësisht pasditen e finales së Champions League që luhej në Madrid mes Interit dhe Bayern”.
Galliani ka folur edhe për gjysmëfinalen mes Romës dhe Liverpool dhe kujton me dhimbshuri atë Champions të humbur në mënyrë dramatike përballë “The Reds”. “Do të shkoj ta shoh ndeshjen në ‘Olimpico’. Më ka ftuar Gandini: më datën 2 maj në darkë do të jem prezent në tribunën e stadiumit me një shall verdhekuq në qafë, sepse sa herë që mendoj për ndeshjen e famshme të Stambollit acarohem nga nervat”.
Gattuso– “Të them të drejtën nuk e kisha imagjinuar, nuk mund të them gënjeshtra: më ka habitur pozitivisht dhe ia kam thënë, pasi i dërgoj vazhdimisht mesazhe. Rinon e shikoja gjithmonë aq të zjarrtë, i egër në fushë dhe në dhomat e zhveshjeve. Nuk e kisha imagjinuar kurrë si trajner. Kam shumë simpati për të. Pas disfatës së Stambollit donte të largohej pasi ishte i dashuruar me Milanin dhe thoshte se kështu do t’i kalonte dhimbja për humbjen e Champions më shpejt”.
Ibran – “Ibrahimovic? Është e drejtë që të shkojë në Botëror, siç thotë shprehja ai ka licencën për të vrarë. Të jep forcë, udhëheq çdo skuadër, është një supermen. Sherri i bujshëm me Onyewu? Nuk më kujtohet…”
