Enver Gjoni, fqinj me Habilajt ka rrëfyer se çfarë di dhe si i njeh vëllezërit, të cilët akuzohen nga autoritetet italiane si pjesë e një bande të trafikut të drogës.
Gjoni, nga fshati Babicë e Vlorës, ka dhënë një prononcim për Top Channel, ku ka rrëfyer se është rritur me vëllezërit Habilaj, ndërsa ka një lidhje të veçantë me Florianin, i cili njihet si Lolo.
Florian Habilaj është në kërkim ndërkombëtar dhe për prokurorët shqiptarë ai është njeriu që di emrin e shefit të madh, të cilin e përmend në përgjimet e zbardhura në dosjen e Prokurorisë së Katanias.
Lolo, thotë Enveri, ka punuar që i vogël duke blerë ullinj në bregdet, e më pas i shiste, ndërsa shton se nuk e beson se shokët e tij të fëmijërisë janë marrë me punë të pista:
“I kam vëllezër, i kam fshatarë, gjiton. Lajmin e kam marrë pas 3 ditësh, nga televizori më saktë. Mendimi im? Është një fatkeqësi ça dëgjova në media dhe habitem. Unë duhet të isha në gjendje më të mirë, po të ishin në ato kushte ata siç thotë media. Po të kishin aq, edhe unë do isha më mirë. Shumë shpejt, shumë shpejt do të dalë e vërteta,” tha ai.
